1 Yange Paulu, kanganda ua Kilistu Yesu ku cizango ca Njambi, njili na Timateo muanetu.

2 Njili nakutuma ou mukanda kuli yeni vantu va Njambi vakulela na vamuanetu vakulongua muli Kilistu ku Kolose:

Kavumbi kuli yeni na ciyulo vije vihuma kuli Njambi Tatetu.

3 Ntsimbu yoshe tukatsantsela Njambi Ishe ya Muene uetu Yesu Kilistu, omo nga tumilombelela, 4 muomu tunevu lutsilielo lueni muli Kilistu Yesu na cizango cije cimulinaco ku vantu voshe vakulela va Njambi, 5 muomu ya kutsiliela cije civanamitulikila yeni muilu. Cije cimuevuile laja mu lizi lia vusunga, likelio lia Muzimbu Uacili 6 uje uneja kuli yeni, cilivene ha mavu oshe lilinakuima vushuka nakukola ngue muje mulili nakulingilamo kuli yeni vavenia, kuhuma ha litangua limuovuile nakuvuisisa kavumbi ka Njambi mu vusunga. 7 Ngue muje mumua lilongesele kuli Epafalase ngamba mukuetu uje ituazanga. Ikeye napu ntuama uakulongua ua Kilistu mu kutupangelako, 8 kaha ikeye uje natuleke cizango ceni cije cimuli naco mu Cimbembesi.

9 Kaha muomu ya cuma eci, hume ha litangua lije tuacuvuile, kutualikelele ku milombelela. Tukalombo Njambi nguetu linga mushule na mana a cizango cendi mu mana nakuvuisisa coshe cije cimbembesi akahana, 10 linga muyoye vuyoye vuje vuatonda Muene, vuje vumuvuahelesa mu vingila vioshe, kuima vushuka mu vipangi vioshe vije viacili na kulivuezelela mu mana a Njambi. 11 Tukamilombelelako kuli Njambi linga amikolese na nzili yoshe, kuya ku nzili yendi yoshe ya vumpau linga mukale nalukakateya na kusimpa ca nzolela, 12 nakuhana kutsantsela kuli Tate uje natupuisa linga tuase kukala na mutambela mukusuana ca vantu vakulela va Njambi mu ceke. 13 Natuhumisa ku nzili ya milima nakutuneha ku vumuene vua Munendi uje yazanga, 14 muje muli ikeye mukemo mutunapatukila, cikeco kukonekela ca vipi.

15 Kilistu ikeye cifua ca Njambi uje kutuasa kumona, ntuatua ua viakutanga vioshe. 16 Muomu kuhitila muli ikeye viuma vioshe vavitangele, via muilu nevi viaha mavu, vije vitumona na vije kutumono, cipue matanda, cipue vinzili via vimbembesi, cipue vimiene, cipue vaka nzili yakama. Viuma vioshe vavitangele kuhitila muli ikeye muomu naua ya ikeye. 17 Ikeye kuakele tele kanda viuma vioshe, kaha muli ikeye viuma vioshe viakala hamo. 18 Ikeye mutue ua muvila uendi ukeuo cikungulukilo, ikeye maputukilo, ntuatua uakuhuma ku vatsi, linga ikeye akale na cihela cakulivanga mu viuma vioshe. 19 Muomu camuvuahelesele Njambi linga kushula cendi coshe cikale muli ikeye, 20 kaha kuhitila muli ikeye linga anehe viuma vioshe kuli ikeye nakulikonekela, ha mavu cipue muilu, hakulinga ciyulo kuhitila ha maninga aje ahitile ha cilindakano cendi.

21 Kaha yeni, vaje ha ntsimbu imo muakele kulahako na Njambi nakupua vitozi vendi mu mana eni muomu ya viuma viavipi vije vimualingile. 22 Vuno honi nalikonekela neni kuhitila mu muvila uendi ua vuntu ha kutsa cendi, linga mupue vakulela vakuhona kapayo nakuhona mulonga kuli ikeye, 23 kaha nga mutualelelaho mu lutsilielo, nakukola na lukakateya, cakuhona kuhuma ku kutsiliela ca Muzimbu Uacili uje muovuile, uje uvanambulula ku cakutanga coshe cije cili muintsi lia melu, kaha na cije yange, Paulu njapuilile ngamba.

24 Honi njivuahelela mu tuyando tuange muomu yeni, kaha mu vuntu vuange njimanusula vije vinahonua mu tuyando tua Kilistu muomu ya muvila uendi, uje ukeuo cikungulukilo, 25 cije calingisile ngeci njipue ngamba kuya ku cipangi ca vusunga cije civanjihanene muomu yeni, linga lizi lia Njambi valizivuke muakushula, 26 vushueke vuje vuvashueka ha miaka yaingi na ku vikota vioshe vuno honi vanavusholola ku vantu vendi vakulela va Njambi. 27 Kuli vakevo Njambi uahanguile linga vazivuke muje vati vukama vua vufuko vua vumpau vua vushueke ovu hakati ka vaje keti Vayunda, vuje vukevuo Kilistu uje ali muli yeni, ikeye kutsiliela ca vumpau. 28 Ikeye uje tuli nakuambulula, kunangula muntu uoshe nakulongesa muntu uoshe mu mana oshe, linga tupuise muntu uoshe kupua uakukola muli Kilistu. 29 Muomu yeci njilinakupanga cikuma, na kuhundangana na nzili yoshe ije Kilistu akapangesa muli yange.