1 Ambahoni nga vanamisangula hamo na Kilistu, kaha tondeni viuma vije vili muilu, kuje kukeko kuali Kilistu, natumama ku livoko lia cilio lia Njambi. 2 Hakeleni mana eni ku viuma vije vili muilu, keti ku viuma vije vili ha mavu. 3 Muomu muatsile, kaha miono yeni vanaishueke na Kilistu muli Njambi. 4 Omo Kilistu uje ikeye muono uetu akasholoka, ambahoni neni naua mukasholoka nendi mu vumpau.

5 Nankuma, tsiheni vije vinapu via mavu muli yeni, vije vikevio via vupangala, kuhona kulilelesa, mashungu, mashungu a mapi na cipululu, cije cikeco vene kulemesa tumponia. 6 Muomu ya viuma evi, vutenu vua Njambi vuli nakuija. 7 Mu viuma evi ha ntsimbu imo muendelemo, omo muakele nakuyoyela muli vikevio.

8 Vuno honi hano munapande kumbila kuti viuma evi vikevio vije via kuniengua, vutenu, cizindo, kutuka na mezi a mapi kuhuma mu kanua keni. 9 Keti mulikuise umo na mukuavo, mukumona ngeci munombila vuntu vualaja na vilinga viavuo, 10 kaha munazala vuntu vuavuha, vuje vuvanapuisa vua vuha mu mana a cifua ca liavenia Samatanga. 11 Hano kukuesi Kangelengu cipue Kayunda, mukakulovoka cipue mukakuhona kulovoka, muhuza, cipapoke, ndungo na uakupatuka, vuno honi Kilistu napu ua voshe kaha naua mu vioshe.

12 Ambahoni, zaleni ngue vantu vakuhangula va Njambi, vakakulela na kuzanga, vacikeketima, na ngozi, na kulikehesa, na kuholoka na kusimpa, 13 kulikonekela umo na mukuavo, kaha nga umo alina ciniengo hali mukuavo, kaha likonekeleni umo na mukuavo, ngue muje Muene nakonekela yeni, neni naua munapande kukonekela. 14 Kaha helu lia vioshe evi hakeleniho cizango, cije cikakutila viuma vioshe hamolika mu vumo vuacili. 15 Kaha eceleni ciyulo ca Kilistu ciyule mu mitima yeni, kuje cilivene vamisanene kupua muvila umolika. Kaha pueni vaka kutsantsela. 16 Eceleni lizi lia Kilistu likale muli yeni cikuma, longeseni nakulinangula umo na mukuavo mu mana oshe, kaha imbeni miaso yakuntsenkulu, na miaso, na miaso ya cimbembesi nakutsantsela mu mitima yeni kuli Njambi. 17 Kaha vioshe mulinga, mu lizi cipue mu vilinga, vilingeni vioshe mu lizina lia Muene Yesu, nakuhana kutsantsela kuli Njambi Tate kuhitila muli ikeye.

18 Vampuevo vakushomboka, lihaneni yeni vavenia ku vamala veni ngue mucinailamo muli Muene.

19 Vamala vakuambata, zangeni vampuevo veni, kaha keti mupue vakutenuka kuli vakevo.

20 Vana, ononokeni visemi veni mu vioshe, muomu eci cikeco civuahelesa Muene.

21 Visemi va vamala keti muputuke vana veni, ketingoconi vapihilila ku mitima yavo.

22 Vandungo, ononokeni kuli vaje vanapu vimiene veni va ha mavu mu vioshe, keti lika kuvanga kuvali vamimona, ngue vantu vaje vakakutonda lika kuvuahelesa vakuavo vantu, vuno honi cipuevene muli likalieni mu mitima yeni, muomu yakuvuila Muene liova. 23 Mu vioshe mulinga, pangeni na mutima umo, ngue muli nakupangela Muene keti vantu, 24 okumuazivuka ngueni kuli Muene kukeko mukatambula vusuana kupua ngue vuana vueni, muomu mulina kupangela Muene Kilistu. 25 Muomu uje muka kupanga via vipi vakamufueta naua via vipi vije vianapanga, kaha kukuesi civembulu.