1 Muomu njitonda yeni linga muzivuke muje vati njikahundangana cikuma muomu yeni, kaha muomu ya vaje vali ku Laondisiya, kaha na muomu ya voshe vaje kanda vamone cihanga cange, 2 ngeci vasimpise mitima yavo oku vali hamo mu cizango, linga vakale na vufuko vuoshe vua kuvuisisa coshe ca vusunga na mana a vushueke vua Njambi, akeuo Kilistu, 3 uje muli ikeye mukemo vashueka vufuko vuoshe vua mana na mangana. 4 Njihandeka eci linga naumo uahi amikuise na vihandeka via makuli cipue vene vivuike vati muacili. 5 Muomu cipue vene njiuahiko mu vuntu, vuno honi njilineni mu cimbembesi, nakuvuahelela mukumona katumamesi keni nakukolesa ca lutsilielo lueni muli Kilistu.

6 Nankuma, ngue muje mu munatambula Kilistu Yesu kupua Muene, ngeci vene tualeleniho kuyoya muli ikeye, 7 mizi yeni itande nakutunga muli ikeye nakukolesa mu lutsilielo, ngue muje vene mu vamilongesele, nakushula mukutsantsela.

8 Taleni ngeci naumo uahi akamipuise vandungo na mana endi a vuntu na makuli angoco, aje ahuma ku vilongesa via vantu naku vimbembesi via hano ha mavu vije vilinakuyula kaha keti ngue kuya kuli Kilistu. 9 Muomu mu muvila uendi mukemo muakala kushula coshe ca vunjambi, 10 kaha neni munapu vakushula na muono muli ikeye, uje ikeye uapua mutue ua lishiko lioshe na nzili yakama.

11 Muli ikeye naua mukemo mu mualovokele nakulovoka cije keti ca mavoko, ha kuhumisa muvila ua ntsitu mu kulovoka ca Kilistu, 12 kaha vamitsindile hamo nendi mu kumimbuitika, naua vamisanguile hamo nendi kuhitila mu lutsilielo kuya ku vipangi via Njambi, uje uamusanguile ku vatsi. 13 Kaha yeni, vaje vatsile mu vipi nakuhona kulovoka ku muvila ua ntsitu yeni, Njambi namineha ku muono hamo nendi, mukutukonekela yetu ku vipi vietu vioshe, 14 uahumisile visoneka via mulonga uetu na mashiko avio, kaha eci uacihumisile ha kucishukika ha cilindakano. 15 Ha cilindakano Kilistu ualipatuile ikeye vavenia kuhuma ku vinzili via vimbembesi vije vilina kuyula na vinzili viakama, ualingile eci mutania muelu ha kuvipuisa cimueso mukupua vinzinda mukuhiana cendi.

16 Nankuma, keti muecele muntu uoshe amisompe mukumihula ha viakulia na viakunua cipue kuya ku viuano, cipue ku ciuano ca kutentama ca ngonde, cipue via litangua lia Sapalalo. 17 Evi vikevio lika cimbembe ca viuma vije vili nakuija, vuno honi vusunga vuakundama kuli Kilistu. 18 Keti muecele muntu uoshe amihonouese, uje alisholola ikeye vavenia kupua uakama na kulemesa tungelo, muomu ha vimona vimo vije ahandeka hakulikehesa ca makuli muomu vantu va cifua cangacije vakalihalesa na viyongola viavo via vuntu, 19 kaha vanalikela kukakatela kuli Kilistu, uje napu mutue ua muvila. Uje kuli ukeuo muvila uoshe vanaulisa naku ukuatesa hamolika kuhitila manunga auo na vusoso, kaha uli nakukola ngue muje muatondelamo Njambi linga ukolemo.

20 Nga yeni muatsile na Kilistu ku vimbembesi vije vili nakuyula via hano ha mavu, nkuma vika muli nakuyoya ngue hanga mucili mu vaka mavu? Nkuma vika muli nakulihanena ku mashiko avio aje ahandeka nguauo, 21 "Keti mukuate eci! Keti mumakele cije! Keti mukuate cije?" 22 Evi vioshe vilumbununa viuma vije vikanongo hanima yakuvipangesa, kuya ku mashiko na vilongesa via vuntu. 23 Evi cilivene visholoka kupua viakukundama ku mana mukusindiya cavo cakulemesa nakulikehesa ca makuli nakuyandesa mivila, vuno honi akeuo kuesi na seho mukuvindika mashungu a ku muvila.