1 Yeni vaka Ngalatiya vakuhona! Nkuma iya namilouo? ku mesho aveya Yesu Kilistu vamuhanene ku vivunga nakumushukika! 2 Vandameneni njimihule eci. Nkuma yeni muatambuile Cimbembesi ha vipangi via lishiko indi mukuvuilila na lutsilielo ndi? 3 Nkuma muvilema vati yeni? Muaputukile na Cimbembesi, nkuma mumanusula honi na ntsitu ndi? 4 Nkuma muahitila vene mu viuma viavingi muangoco ndi? Cilivene nga vinayi muangoco. 5 Nkuma uje akamihana Cimbembesi nakupanga vikomoueso hakati keni akavipanga na vipangi via lishiko indi ha viakuvuilila na lutsilielo?

6 Mukemo vene Avilahama "uatsilielele Njambi, kaha vamutandeleleko kupua uavusunga." 7 Ivuisiseni ngeci omu mukemo vene mucinafu yeni vamala va lutsilielo vaje vakevo vana va Avilahama. 8 Kaha navisoneka hakumona vije vilikulutue ngeci Njambi akalinga vaje keti Vayunda kupua vaka vusunga ha lutsilielo, nakuambulula Muzimbu Uacili mukulivanga kuli Avilahama nguendi, "Muli yove mafuti vioshe akavikuisula." 9 Nankuma, vaje vantu voshe vali na lutsilielo vanavakuisula hamo na Avilahama uje uakele na lutsilielo.

10 Voshe vaje vajendamena ha vipangi via lishiko vanavasingi, muomu vavisoneka nguavo, "Uakusingiua uoshe uje kaniungu viuma vioshe vije vivanasoneka mu livulu lia lishiko nakuvilinga." 11 Honi calumbunuka muacili ngeci naumo uahi muntu ivapuisa uavusunga kuli Njambi ha lishiko, muomu "Uoshe uje alinga vusunga kuhitila mu lutsilielo akayoya." 12 Vuno honi lishiko kuliakundamene ha lutsilielo, muomu "Uoshe uje alinga muayilamo lishiko akayoya." 13 Kilistu uatupatuile yetu ku cisingo ca lishiko, hakupua ikeye cisingo muomu yetu omo vacisoneka nguavo, "Uakusinga uje ivanashukika ha muti," 14 linga muli Kilistu Yesu ngeci vije vikuisulo via Avilahama vije kuli vaje keti Vayunda, kaha linga tutambule cikulaheso ca Cimbembesi kuhitila mu lutsilielo.

15 Vamuanetu njihana cimueso ca litangua lioshe mu muono uetu, naumo uahi asa kuhumisa ku litavasano lia muntu cipue kuvuezelelako, hanima ya kulikuta. 16 Honi vikulaheso vivapangelele Avilahama na mutekuluila uendi. Visoneka kuvihandeka nguavio, "Nakuli vatekuluila," kulumbununa vavengi, vuno honi kulumbununa umo lika, "Nakuli mutekuluila uove," ikeye Kilistu. 17 Evi vikevio vinjili nakulumbununa: lishiko lije liezile ha miaka vihita viuana na makumi atatu (430) yakunima, kuliayenguile litavasano lia laja lije Njambi ualingile, nakuhumisa cikulaheso cendi. 18 Muomu nga kusuana cakundama ha lishiko, kaha kucesi naua ha cikulaheso, vuno honi Njambi uacihanene kuli Avilahama ha cikulaheso.

19 Nkuma omo vikahoni lishiko? Valihakeleko muomu ya vupi, kuvanga noho hakezila uje mutekuluila uje ivalingilile cije cikulaheso. Lishiko valihanene kuhitila muli tungelo nakulikundika kuli muka kuimanena mukati. 20 Honi muka kuimanena mukati emanena vavengi, vuno honi Njambi uapua umo lika.

21 Nkuma lishiko lilinakuluisa vikulaheso via Njambi ndi? Cilivene houe, muomu nga lishiko valihanene nguavo liyoyese, kaha cilivene vusunga ngue vuneja muomu ya lishiko. 22 Vuno honi visoneka vinahaka viuma vioshe ku vupi, linga vioshe vije vivakulahesele ku lutsilielo muli Yesu Kilistu vakavihane kuli vaje vatsiliela.

23 Honi tele kanda lutsilielo luije, vatukutile ku Lishiko nakutupuisa vinzinda noho vakasholola lutsilielo. 24 Kaha na Lishiko liakele nakutuendesa kuvanga noho hezilile Kilistu, linga vatupuise vaka vusunga kuhitila mu lutsilielo. 25 Vuno honi ntsimbu ya lutsilielo ineja, kaha honi kutuapuile naua vinzinda va lishiko.

26 Muomu muli Kilistu Yesu muva voshe munapu vana va Njambi kuhitila mu lutsilielo. 27 Muomu vuingi vueni vaje vavambuitikile muli Kilistu munazala Kilistu. 28 Kukuesi honi Kayunda cipue Kangelengu, kukuesi ndungo cipue uakupatuka, kukuesi yala cipue mpuevo, muomu muva voshe munapu umo muli Kilistu Yesu. 29 Kaha nga munapu muvaka Kilistu, kaha muvatekuluila va Avilahama, kaha muva kakusuana kuya ku cikulaheso.