1 Nkuma vikahoni tuhandeka hali kukuluila yetu Avilahama, vika vialingiuile kuli ikeye? 2 Nga Avilahama vamupuisile muka vusunga ku mesho a Njambi ha viuma vije vialingile, ngue ualishashele, vuno honi ikeye kalishashele ku mesho a Njambi. 3 Visoneka vihandeka nguavio, "Avilahama uatsilielelele Njambi, kaha muomu ha lutsilielo luendi, Njambi uamutambuile kupua muka vusunga." 4 Muntu uje apanga atambula fueto, vuno honi fueto yendi kuvasa kuitumbula nguavo vuana, muomu inapu cuma cije napangela. 5 Vuno honi muntu uje natsiliela lika ha lutsilielo, keti ha vilinga viendi, kaha uje atsiliela kuli Njambi uje muka kukonekela muka mulonga kupua uakuhona mulonga, kunapu kutsiliela cendi kuje Njambi ayongola linga amupuise muka vusunga ku mesho endi. 6 Eci cikeco calumbunuine Ndaviti omo uahandekele ha vikuisulo via muntu uje Njambi namupuisa muka vusunga, kuakuhona cuma cimo cije calinga uje muntu,

7 "Vakukuisula vantu vaje Njambi navakonekela ku vipi viavo,

Vantu vaje vipi viavo vanavikonekela!

8 Uakukuisula muntu uje Muene kakamuanukila vipi viendi!"

9 Nkuma kukuisula cije cahandekele Ndaviti cakundama lika kuli vaka kulovoka ndi? Cilivene houe! Cinakundama naua nakuli vaje vaka kuhona kulovoka. Muomu tunamono laja mu visoneka nguavio, "Avilahama uatsilielelele kuli Njambi, kaha muomu ya lutsilielo luendi Njambi uamupuisile muka vusunga." 10 Nkuma ntsimbu mukahoni cuma eci calingiuile? Nkuma eci calingiuile tele Avilahama kanda alovoke ndi? Houe tele kanda alovoke. 11 Vamulovuele, kaha kulovoka cendi capuile cimueso cakumuesa ngeci muomu ya kutsiliela cendi Njambi uamutambuile kupua muka vusunga ntsimbu kanda vacimulovole. Nankuma, Avilahama napu ishe ua voshe vaka kutsiliela kuli Njambi, kaha Njambi navatambula kupua vaka vusunga, cipue vene kuvalovokele. 12 Kaha ikeye naua napu ishe ua voshe vaje vanalovoka keti lika kuli vaje vanalovoka vuno honi linga vavuezeleleko mukulovoka, vayoye yoyesi yakutsiliela ije yayoyele tatetu Avilahama ntsimbu kanda alovoke.

13 Omo Njambi uakulahesele Avilahama na vatekuluila vendi ngeci vakasuana mavu, ualingile eci, keti ngue Avilahama uononokele lishiko houe, vuno honi uatsilielele, kaha Njambi uamutambuile kupua muka vusunga. 14 Muomu nga vije viakulahesele Njambi vavihana kuli vaje vononoka lishiko lia Mosesa, kaha lutsilielo lua muntu lupua luangoco, naua kaha cikulaheso ca Njambi cinapu cakuhona seho. 15 Muomu lishiko lineha vutenu vua Njambi, vuno honi nga kukuesi lishiko, kaha kukuesi kupokola lishiko.

16 Nankuma, cikulaheso cajendamenene ha lutsilielo, linga cikulaheso vapande kucikolesela kupua vuana vua Njambi kuli vatekuluila voshe va Avilahama, keti lika kuli vaje vononoka lishiko houe, vuno honi naua na kuli vaje vatsiliela ngue mualingile Avilahama. Muomu Avilahama napu tatetu ua voshe vaka kutsiliela. 17 Ngue muvanasoneka mu visoneka nguavo, "Njinakupuisa ishe ya mafuti oshe." Nankuma, cikulaheso cinapu cacili ku mesho a Njambi, uje yatsilielele Avilahama, Njambi uje muka kusangula vatsi, uje hakushika cendi aneha viuma vije kuviesiko linga vikaleko. 18 Avilahama uatsilielele nakukala na lutsilielo, cipuevene kukuakele cuma catsilielele, kaha uapuile "Ishe ya mafuti oshe." Ngue muvanasoneka mu visoneka nguavo, "Nankuma, vatekuluila vove vakapua vavengi cikuma ngue vintanga ntanga." 19 Avilahama ha ntsimbu ije uakele na miaka yakupua cihita cimolika (100), vuno honi lutsilielo luendi kuluazeyele omo uayonguele ha muvila uendi uje uakele kuyehi na kutsa, cipue ha cuma cije ngeci Sala kasa kusema vana. 20 Kataliangelele mukutsiliela cendi, kaha kakele na kulinienga ha cikulaheso ca Njambi, vuno honi uatsilielele cikuma kaha uashangazalele Njambi. 21 Uatsilielele nguendi Njambi asa kulinga vije vianamukulahesa. 22 Omu mukemo Avilahama ha lutsilielo luendi, vamupuisile muka vusunga ku mesho a Njambi. 23 Mezi aje ahandeka nguauo "Vamupuisile muka vusunga," kuva asonekelele kuli ikeye lika houe. 24 Va asonekelele naua nakuli yetu kupua vaka vusunga, vaje vanatsiliela kuli Njambi uje uasanguile Muene uetu Yesu ku vatsi. 25 Vamuecelele linga atse muomu ya vipi vietu, kaha uamusanguile linga vatupuise vaka vusunga ku mesho a Njambi.