1 Taleni cizango cije Tate natuhana, linga vatusane vana va Njambi, kaha mukemo mutunafu. Mulonga vika mavu ku atuzivuka muomu ku a muzivukile. 2 Vanjazanga, tuvana va Njambi honi, vuno honi kanda tumone omo tukapuilamo, vuno honi tuazivuka nguetu omo akeja tukafua ngue ikeye, muomu tukamumona muje muafuilamo. 3 Uoshe uje ali nakutsiliela eci muli ikeye, alilelese ikeye vavenia ngue muje vene ikeye uapua uakulela.

4 Uoshe a linga vupi apokola lishiko, muomu vupi vunapu kupokola lishiko. 5 Muazivuka ngueni uasholokele linga a humise vipi, kaha muli ikeye kumuesi vipi. 6 Naumo uahi uakala muli ikeye alinga vupi, kaha naua naumo uahi mukakulinga vupi uamumonaho cipue kumuzivuka.

7 Vanike vavandende, keti kukale umo amikuise. Uoshe muka kulinga muacili uapua ua vusunga, ngue muje vene ikeye uapua ua vusunga. 8 Uoshe uje alinga vupi uapua ua Liyavolo, muomu Liyavolo uapua muka kulinga vupi hume hambangelo. Muna Njambi uezilile mulonga uakunongesa vipangi via Liyavolo.

9 Naumo uahi uje uasemuka kuli Njambi akalingi vupi, muomu mbuto ya Njambi ili muli ikeye, kaha kalingi vupi muomu uasemuka kuli Njambi. 10 Muomu yeci linga cimuese ngeci veya vana va Njambi, kaha naveya vana va Liyavolo. Uoshe uje kalingi viacili keti ua Njambi, mucifua cimo vene nauje uoshe kazanga munaina.

11 Muomu ou ukeuo muzimbu uje umuovuile hambangelo, nguavo tunapande kulizanga umo na mukuavo. 12 Keti kupua ngue Kaine uje uapuile muka vupi na kutsiha muanaye. Nkuma vika honi uamutsihilile? Muomu vilinga viendi viapuile via vupi kaha via munaina viapuile via vusunga.

13 Vamuanetu keti mukomoke, ngueni mavu amizinda. 14 Tuazivuka nguetu tuaseze kutsa nakuya ku muono, muomu tuazanga vamuanetu. Uoshe uje kesi na cizango uakala mukutsa. 15 Uoshe uje azinda munaina napu muka kutsiha, kaha muazivuka ngueni muka kutsiha uoshe kakele na muono uayaye muli ikeye. 16 Muomu yeci tuazivuka cizango, ngeci uahanene muono uendi hali yetu, kaha netu tuapande kuhana miono yetu hali vamuanetu. 17 Vuno honi nga uoshe uje ali na vufuko vua ha mavu kaha amona muanaye uje kesi navio, vuno honi ikeye kamuvuila ngozi, Nkuma cizango ca Njambi cikala vati muli ikeye? 18 Vanike vavandende, keti tuzange mu lizi lika cipue mukuhandeka lika, vuno honi mu vilinga na mu vusunga.

19 Muomu yeci kaha tuazivuka nguetu tuvaka vusunga, kaha tuhaka mitima yetu ku mesho endi 20 Omo ntsimbu yoshe mitima yetu ituhisa, muomu Njambi uapua uakama kupulakana mitima yetu, kaha azivuka vioshe. 21 Vamuanetu vanjazanga, nga mitima yetu ku ituhisa, kaha tunasimpi ku mesho a Njambi, 22 kaha tukatambula kuli ikeye vije vioshe tukalomba, muomu tukaniungu mashiko endi nakulinga vije vika muvuahelesa. 23 Kaha eli likelio lishiko liendi, ngeci tunapande kutsiliela mu lizina lia Munendi Yesu Kilistu, na kulizanga umo na muakuavo ngue muje muatushikile. 24 Voshe vaje vaniunga mashiko endi vakala muli ikeye, kaha nendi akala muli vakevo. Kaha hali eci tuazivuka nguetu uakala muli yetu kuhitila mu Cimbembesi uje uatuhanene.