1 Vamuanetu vanjazanga, keti mutsiliele kualukele cimbembesi, vuno honi esekeni vimbembesi linga mumone indi vioshe vihuma kuli Njambi. Muomu tunanguizi vavengi va makuli vanayi ha mavu oshe. 2 Muomu yeci muzivuka Cimbembesi ua Njambi. Cimbembesi uoshe uje ahandeka nguendi Yesu Kilistu neja mu vuntu kaha napu ua kuli Njambi, 3 kaha cimbembesi uje kahandeka nguendi Yesu kahumine kuli Njambi, ou ikeye cimbembesi ua citozi ua Kilistu, uje muovuile nguavo akeja, kaha honi ali laja ha mavu.

4 Yeni vanike vavandende, munapu va kuli Njambi, kaha munavahiana, muomu uje ali muli yeni napu uakama kupulakana uje ali ha mavu. 5 Vakevo vanapu vaka mavu, nankuma vije vivahandeka viapua via mavu, kaha vaka mavu vakovuilila kuli vakevo. 6 Yetu tunapu vantu va Njambi. Kaha uoshe uje azivuka Njambi atuivuilila, kaha uje keti ua kuli Njambi ikeye ka katuivuilila. Kaha hali eci tuazivuka Cimbembesi ua vusunga na cimbembesi ua makuli.

7 Vamuanetu vanjazanga, tuyeni tulizange umo na mukuavo, muomu cizango cahuma kuli Njambi, kaha uoshe uakala na cizango uasemuka kuli Njambi kaha azivuka Njambi. 8 Uoshe uje kesi na cizango kazivuka Njambi, muomu Njambi ikeye cizango. 9 Omu mukemo cizango ca Njambi ua cimuesele hali yetu. Ngeci Njambi uatumine munendi umo lika ha mavu, linga tuyoye kuhitila muli ikeye. 10 Hali eci cikeco cizango, keti ngue nguavo yetu tuazangele Njambi, vuno honi ikeye uatuzangele kaha uatumine Munendi kupua nkombelo ha vipi vietu.

11 Vamuanetu vanjazanga, nga Njambi uatuzangele cikuma, netu naua tuapande kulizanga umo na mukuavo. 12 Kukuesi muntu uamonaho Njambi, vuno honi nga tulizanga umo na mukuavo, kaha Njambi akala muli yetu, na cizango cendi cishula muli yetu.

13 Hali eci mukemo tuzivuka nguetu tuakala muli ikeye kaha na ikeye uakala muli yetu, muomu na tuhana Cimbembesi uendi vavenia. 14 Kaha tunamono na kuhana vukaleho nguetu Tate natumu Munendi kupua Muyoyesi ua vaka mavu. 15 Uoshe uje ahandeka nguendi Yesu ikeye Muna Njambi, kaha Njambi uakala muli ikeye, kaha na ikeye uakala muli Njambi. 16 Kaha honi tuazivuka na kutsiliela cizango cije Njambi ali naco hali yetu.

Njambi ikeye cizango, kaha uoshe uje uakala mu cizango uakala muli Njambi, kaha Njambi uakala muli ikeye. 17 Muli eci mukemo cizango vana cishulisa hakati ketu linga tukale na kusimpa ha litangua lia kusompa, muomu muje muafua ikeye mukemo netu mutunafu hano ha mavu aua. 18 Kukuesi liova mu cizango, vuno honi cizango ca vusunga cikahumisa liova. Muomu liova lineha kashitiko. Uoshe uje ali na liova kapu ua vusunga mu cizango.

19 Tuazanga, muomu ikeye uatuzangele ha kulivanga. 20 Nga umo ahandeka nguendi njazanga Njambi vuno honi uazinda muanaye, uapua ua makuli, muomu uoshe kazanga muanaye uje ya namono, kaha kasa kuzanga Njambi uje kanda amumoneho. 21 Kaha lishiko eli tuli nalio lia huma kuli ikeye, ngeci uoshe uje uazanga Njambi napande kuzanga na muanaye naua.