1 Nankuma njilambelela vakuluntu va cikungulukilo hakati keni, kupua ngue mukuluntu mukuetu na mukaleho ua tuyando tua Kilistu kaha naua ngue naumo uje akauanako mutambela mu vumpau vuje vukasholoka. 2 Niungeni vutanga vua Njambi muomu eci cikeco cipangi ceni, keti na ntsindiye vuno honi na mutima umo, keti muomu ya shuamua vuno honi cipue cakuhuma ku mutima, 3 keti mulipuise vimiene kuli vaje vamulina kutuamenena vuno honi pueni cimueso ku vutanga. 4 Kaha omo Kaniungi uakama vakamusholola, kaha mukutambula cilongo ca vumpau ca kuhona kutsitsivala.

5 Mucifua cimo vene neni vanike lihakeni muintsi lia vakuluntu. Muva voshe munapande kuzala kulikehesa ku umo na mukuavo, muomu "Njambi uazinda kulihalesa, vuno honi a kahana kavumbi kuli vaka kuononoka." 6 Nankuma likeheseni yeni vavenia muintsi ya livoko lia nzili yoshe lia Njambi, linga amijundule ha ntsimbu yendi. 7 Hakeni vishoti vieni vioshe hali ikeye, muomu ikeye muka kuminiunga.

8 Lihiluleni yeni vavenia kaha nangukeni. Citozi ceni Liyavolo ali na kuendangana oku ohia ngue ndumba, mukutonda umo linga a musaniozole. 9 Muvianeni, koleni ngoo mulutsilielo lueni, mukuzivuka ngeci tuyando tumuli nakuhitamo tuketuo vene tuyando tuvakahitamo vamuanoko ha mavu oshe. 10 Kaha hanima ya kuyanda muka ntsimbu lika, Njambi ua kavumbi koshe, uje na misana ku vumpau vuendi vuayaye muli Kilistu, ikeye vavenia akamihiluisa, akamitunga na kumikolesa. 11 Kuli ikeye kukale nzili ya yaye. Ameni.

12 Njamisonekela ou mukanda muvuihi na Silase, muanetu uaku kulongua ngue muje njikamutumbula, na kumikolesa na kuhana vukaleho ngeci aka kakeko kavumbi ka vusunga ka Njambi, kaha imaneni ngoo hali kakeko. 13 Cikungulukilo camu Mbambilone, vaje na vakevo vavahanguile, vanamimeneka, kaha naua na munange Mako na mimeneka. 14 Limenekeni umo na mukuavo na kulitsemba ca cizango. Ciyulo cikale neni muva voshe vaje vali muli Kilistu.