1 Nankuma muomu Kilistu uayandele ku muvila, livuaheseleni yeni vavenia na visinganieka via kulifua, muomu uoshe uje nayanda ku muvila kakundama naua ku vupi, 2 linga vayoye ha ntsimbu yoshe mu muvila keti naua mu mashungu a vuntu vuno honi ku cizango ca Njambi. 3 Kunima muapihisile ntsimbu yakama mu kulinga vije vivakazanga kulinga vaka mavu. Muombilile kuyoya ceni mu vupi, namu mashungu amapi, namu kupenda, namu kukina, namu vimpunga via kunua, namu kulemesa tumponia. 4 Vanakomoka nguavo honi kumua lipandakanene navo mu vilinga viavo via mavu via vipi, kaha vamiyandesa, 5 vuno honi vaka liambulula kuli ikeye uje nalivuahesela kusompa vaka kuyoya na vaka kutsa. 6 Omu mukemuo vene ngeci vambuluile Muzimbu Uacili cipue kuva ka kutsa, linga cipue vene va vasompa ku muvila ngue vantu vuno honi va napande kuyoya mu cimbembesi ngue Njambi.

7 Mamanusuilo a viuma vioshe ali muyehi, nankuma liniungeni na kuononoka muomu ya malombelo eni. 8 Ha viuma vioshe evi tualeleniho cizango ceni ku umo na mukuavo, muomu cizango cikafuiki vipi viavingi. 9 Lilongeseni kujumbula kuakuhona nkulundundu ku umo na mukuavo. 10 Muntu na muntu napande kupangesa muavusunga vuana vuje vua natambula mu kukuasa vakuavo, ngue vaka kupanga va vusunga va Njambi mu kavumbi ka kuliseza seza, 11 uoshe uje ahandeka, ngue uje ambulula mezi vene a Njambi, uoshe uje alinga cipangi, acilinge ngue umo uje acilinga na nzili ije Njambi akahana, ha cuma eci vanapande kuhana Njambi vumpau mu vioshe kuhitila muli Yesu Kilistu. Kuli ikeye kukale vumpau na nzili ya yaye. Ameni.

12 Vanjazanga, keti mukomoke ha vieseko vije vija hali yeni mu kumieseka, ngue vene viuma viavihia vije vialingiuile kuli yeni. 13 Vuno honi joleleleni muomu muli nakulipangela tuyando tua Kilistu, linga naua mukajolelele na kuvuahelela omo vumpau vuendi vukasholoka. 14 Nga vamishaula muomu ya lizina lia Kilistu, munapu vakukuisula muomu cimbembesi ca vumpau na ca Njambi cakala hali yeni. 15 Vuno honi keti kukale umo ueni ayande ngue muka kutsiha, cipue muizi cipue muka kulinga vupi, cipue muka kukovela mu vimpande via vakuavo, 16 vuno honi nga umo ayanda oku ikeye uapua Muka Kilistu, keti ovue shuamua, vuno honi muintsi ya lizina lije napande kuhana Njambi vumpau. 17 Muomu ntsimbu inahete ya kusompa kaha ikaputuka na vaje vakundama ku njivo ya Njambi, kaha nga iputuka netu, nkuma akapua vati mamanusuilo avaje kuve kuononoka Muzimbu Uacili ua Njambi? 18 Kaha

"Nga cikapua ca cikalu ku muntu ua vusunga kuovoka,

nkuma honi vaka kasauntu na vaka vupi vakevo vaka sholokela kuli?"

19 Nankuma vaje voshe vayanda muomu ya cizango ca Njambi valinge vusunga na kuhaka miono yavo kuli Samatanga uakulongua.