1 Nankuma umbileni viuma vioshe via vipi na vioshe via makuli na vioshe via civembulu na via cipululu na via kasauntu vioshe. 2 Ngue tukeke vaje vanasemuka vuavuno, tondeni mavele a cili aku cimbembesi, linga muomu yauo mukole mukuovoka, 3 muomu munamakela ngozi ya Njambi.

4 Ijeni kuli ikeye, livue lije lia kuyoya, lije livavianene vantu vuno honi ku mesho a Njambi valihanguile kaha naua lili na seho. 5 Neni naua munapu ngue mavue a kuyoya, kaha eceleni ngeci vamitunge kupua njivo ya cimbembesi, kupua vasasendote vakulela, mukuhana nkombelo ya cimbembesi uje vatambula kuli Njambi kuhitila muli Yesu Kilistu. 6 Muomu visoneka vihandeka nguavio,

"Taleni, njili nakusaleka livue mu Siyone, (ngue kushimbika cisimi ca mumbango) cije ca kuhangula na seho,

kaha uoshe a tsiliela muli ikeye ka kevu shuamua,"

7 Nankuma kuli yeni vaje vaka kutsiliela, uapua ua seho, vuno honi kuli vaje vakakuhona kutsiliela,

"Livue lije vene vaje vakakutunga vavianene

linapu (cisimi ca mumbango) ca seho,"

8 kaha naua,

"Livue lije lika vatsuntsuisa vantu,

eli livue likelio vene likavauisa,"

vakatsuntsuka muomu kuvononokele lizi, kusetekesa namuje muva valekelele linga valingemo.

9 Vuno honi yeni munapu muyati ua kuhangula, muyati ua vusasendote, cifuti ca kulela, vantu va Njambi, linga muhandeke vilinga viendi viacili uje ua misanene kumihumisa mu milima na kumineha mu ceke cakuhiana. 10 Laja kumuapuile mu vantu vuno honi hano munapu vantu va Njambi, laja ku muatambuile cikeketima vuno honi hano munatambula cikeketima.

11 Vanjazanga, njimilomba nguange pueni ngue vangenzi na vinzinda muhume ku lishungu lia muvila lije lineha nzita ku miono yeni. 12 Kuateleleni kulinga vilinga viacili kuli vaje keti Vayunda, ngeci hamo vahandeka nguavo muvaka kulinga via vipi, vanapande kumona vilinga vieni viacili na kuhana Njambi vumpau ha litangua lije akeja.

13 Likeheseni kuli vaka nzili yakama voshe muomu ya Muene, cipue kuli nguvulu uje ali nanzili yakama, 14 cipue kuli vanguvulu vaje ikeye natumu linga vahane kashitiko vaje valinga vupi na kushangazala vaje valinga viacili.

15 Muomu cinapu cizango ca Njambi ngeci mukulinga vusunga munapande kumanesa mana amapi avantu va vilema. 16 Yoyeni ngue vantu vakupatuka, vuno honi keti mulikuasese kupatuka ceni kupua lisesa lia kulingilamo vupi, vuno honi yoyeni ngue vangamba va Njambi. 17 Haneni kalemesa ku vantu voshe. Zanga ntanga ya vaka kutsiliela. Ivuileni Njambi liova. Haneni kalemesa nguvulu.

18 Vangamba, likeheseni kuli vimiene veni na kalemeso koshe, keti lika kuvaka ngozi na vaka kulikehesa vuno honi nakuli vaje naua vaka vutenu. 19 Muomu umo vakamuvezikisa, nga akala na visinganieka via Njambi, nga atualelelaho na lukakateya mukuvua kuvavala oku ayanda tuyando tuje kutua mupandele. 20 Muomu seho muka iliho nga mutualelelaho na lukakatela ku vipumpu vije viamipande muomu ya kulinga vupi? vuno honi nga mutualelelaho na lukakatela mu kuyanda cipue vene omo yeni munalingi muacili, Njambi akamikuisuilavio. 21 Muomu yeci vanamisana, muomu Kilistu na ikeye naua ua miyandelele, namisezela cimueso, linga mukavangeye mu mingano yendi. 22 Kalingile vupi, kaha ku muahumine makuli mukanua kendi. 23 Omo vamushauile, ikeye kavashauile, omo vamuyandesele ikeye kavateuesele, vuno honi ikeye uatsilielele kuli uje muka kusompa muavusunga. 24 Ikeye vavenia uambatele vipi vietu mu muvila uendi ha cilindakano, linga tutse ku vupi kaha tuyoye ku vusunga. Ha vimbandu viendi muna kanguka. 25 Muomu muazimbalele ngue vampanga, vuno honi muahiluka kuli Kaniungi na Muka kuniunga miono yeni.