1 Mucifua cimo vene vampuevo vakushomboka, lihaneni kuli vamala veni, linga vamo, cipue vene kuvononoka lizi, hamo vaka vakokela kuli Njambi cipue kua kuhona lizi vuno honi kuhitila mu vilinga via vampuevo vavo, 2 omo vamona kasingimiko na futisi yeni ya cili. 3 Keti muvuahese lika muvila ueni uahambanza mu kulivinda vinkambu, na kulipesa pesa na ngolinde, na kuzala vuzalo vuasenga, 4 vuno honi munapande kuvuahesa muntu uje ualishueka mukati ka mitima yeni na makualale aje ku ekunonga a kulikehesa na a cimbembesi ca kuholoka vije vikevio viapua via seho cikuma ku mesho a Njambi. 5 Honi omu mukemo vampuevo vakulela vakulaja vaje vatsilielele muli Njambi mukemo valipesele pesele vakevo vavenia nakulihana kuli vamala vavo, 6 ngue Sala uononokele Avilahama, ua musanene nguendi muene. Kaha munapu honi muvana vendi nga mulinga vusunga kaha nacimo cahi capandele kumiteuesa.

7 Mucifua cimo vene neni vamala vakuambata, yoyeni muacili na vampuevo veni, mukuhana kasingimiko mpuevo muntu uakuzeya, muomu mualinungu hamo hakupua vakakusuana kavumbi ka muono, linga malombelo eni keti ahonoue.

8 Cakumanusuila, muva voshe kaleni hamo mu cimbembesi, lisimpiseni, lizangeni umo na mukuavo, na mutima ua ngozi, na ku likehesa mu mana. 9 Keti muhiluise vupi ku vupi cipue cisingo ku cisingo, vuno honi munapande kukuisula, muomu eci cikeco civa misanenene, linga mutambule cikuisulo. 10 Muomu

"Uje a zanga muono

na kutonda kumona matangua a cili,

ndaka yendi kuyapandele kuhandeka viavipi

kaha na kanua kendi ku kapandele kuhandeka makuli,

11 a hume ku vupi kaha alinge viacili,

atonde ciyulo na kucikava

12 Muomu mesho a Muene akatala vaka vusunga,

kaha na matuitui endi apua akushokoloka ku malombelo avo.

Vuno honi cihanga ca Muene ciluisa vaje valinga vupi."

13 Nkuma honi iya aliko uje asa ku mivulumuna nga mulina cishota mutima cakulinga viacili? 14 Vuno honi cipue vene muli na kuyanda muomu ya vusunga vaka mikuisula. Keti muteue muomu yavo, kaha naua keti mulinieniete, 15 vuno honi mu mitima yeni haneni kalemesa Kilistu kupua Muene. Ntsimbu yoshe livuaheseleni kuliluila kuli uoshe uje a mihula ha kutsiliela muli naco, vuno honi cilingeni na kulikehesa na kasingimiko, 16 kaha visinganieka vieni vipue viacili, linga omo vamiyandesa, kuli vaje vakashaula katumamesi keni muli Kilistu kaha vaka vevuise shuamua. 17 Muomu cacili kuyandela kulinga viacili, nga cije cinapu cizango ca Njambi, kupulakana kulinga viavipi. 18 Muomu Kilistu naua uatsililile vipi lumo lika kunahu, muka vusunga kutsila vaka kuhona vusunga, linga a tunehe kuli Njambi, muomu va mutsihile ku vuntu vuno honi vamupuisile ua kuyoya mu Cimbembesi, 19 mukemo muje uayile na kuambulula ku vimbembesi mu kamenga, 20 kuli vaje kuvononokele laja, omo kusimpa ca Njambi ca vandamenene mu matangua a Noua, ha ntsimbu ya kushonga vuato, muje mukemo muovokelele vantu vavandende, vakupua vatanu na vatatu kuhitila mu mema. 21 Kumbuitika, cendelela neci, honi cikeco covola yeni, keti ngue kuhumisa mazilo ha muvila vuno honi ngue kulomba kuli Njambi linga a mihane visinganieka viacili, kuhitila ha kusanguka ca Yesu Kilistu, 22 uje nayi muilu kaha ali ku livoko liacilio lia Njambi, na tungelo, na vaka nzili yakama, na vinzili vije vili muintsi liendi.