1 Yange Petulu, kanganda ua Yesu Kilistu,

Njili nakusonekela ku vantu vaje vahangula Njambi vaje vali mu vunzinda mu vinganda via ku Pontase, na Ngalatiya, na Kapandosiya, na Asiya na ku Mbitaniya. 2 Vaje vavanahangula kuya ku mana a Njambi Tate, kuhitila mu cipangi cakulela ca Cimbembesi, linga mupue vakuononoka kuli Yesu Kilistu na kulela ca maninga endi.

Kavumbi na ciyulo vikale kuli yeni mu vuingi.

3 Kukuisula cikale kuli Njambi, Ishe ya Muene uetu Yesu Kilistu. Ku cikeketima cendi cakama tunasemuka lualuha ku kutsiliela ca kuyoya kuhitila mukusanguka ca Yesu Kilistu kuhuma ku vatsi, 4 na kasuana cije cakuhona kunonga, cakuhona kujuala na kutsitsivala, cije civana mitulikila muilu, 5 cije kuya ku nzili ya Njambi vali nakuciniunga kuhitila mulutsilielo muomu ya kuovoka cije civana vuahesa laja kucisholola mu ntsimbu ya mamanusuilo. 6 Muomu ya cuma eci mujolela, cipue vene nguavo hano muka ntsimbu kakandende muyanda muvieseko viakuliseza seza. 7 Evi vineja linga lutsilielo lueni luje luakama cikuma kupulakana ngolinde ije inonga, cipue hanima yaku inuisa mu tuhia linga vimuese vusunga kaha vikaneha kushangazala, na vumpau na kasingimiko omo Yesu Kilistu akasholoka. 8 Yeni muamuzanga cipuevene kanda mumumone, cipue ku muesi nakumumona ha ntsimbu ino, muatsiliela muli ikeye na kujolelela cakama na kumulemesa na nzolela, 9 Muomu yalutsilielo lueni kaha mukatambula kuovoka ca miono yeni.

10 Tunanguizi, vaje vahandekele vunanguizi ha kavumbi kaje kakapua keni, vatondesesele muacili na kuihula ha kuovoka eci, 11 vehuile nguavo muntu muka cipue ntsimbu muka ivamuesele kuli Cimbembesi ua Kilistu mukati kavo omo vasinganiekelele kulutue tuyando tua Kilistu na vumpau vuje vukakavaho. 12 Vacisholuele kuli vakevo ngue kuvakele nakupangela vakevo vavenia vuno honi yeni, mu viuma vije honi vivanahandeka kuli yeni kuli vaje vambuluile Muzimbu Uacili kuli yeni kuhitila mu Cimbembesi Uakulela uje ivatumine kuhuma muilu, viuma vije vivakatondo cikuma tungelo kuvimona.

13 Nankuma na mana aje akunanguka lihiluleni muvisinganieka vieni, hakeni kutsiliela ceni coshe ku kavumbi kaje kali na kuija kuli yeni hakusholoka ca Yesu Kilistu. 14 Ha kupua vana vaje va kuononoka, keti muyoye ku mashungu eni a mapi alaja akunzimba, 15 vuno honi ngue uje na misana uapua ua kulela, pueni va kulela yeni vavenia muvilinga vieni vioshe, 16 muomu vanacisoneka nguavo, "Mukapua vakulela, muomu Yange njapua uakulela."

17 Kaha nga usana Tate uje muka kusompa muntu ku muntu na seteko imo kuya ku vipangi viendi, liniungeni yeni vavenia na liova ntsimbu yoshe hakukala mu vunzinda vueni. 18 Muomu muazivuka ngueni kuvamilandele na ndando ya viuma via mupulungua viakuhona muono vije vamihanene kuli vakukuluila veni, ngue siliva na ngolinde, 19 vuno honi na maninga akutula a Kilistu, ngue a mpanga uakuhona kapenga cipue katoma. 20 Vamuhanguile tele kanda vatunge luvula lua mavu vuno honi vamusholuele ku vintsimbu via ma manusuilo muomu yeni. 21 Kuhitila muli ikeye munasimpi muli Njambi, uje ua musanguile ku vatsi na kumuhana vumpau, linga lutsilielo lueni na kutsiliela ceni vikale muli Njambi.

22 Honi muomu mualelesa miono yeni hakuononoka ceni ku vusunga linga mukale na cizango cacili hali va muanoko, lizangeni umo na mukuavo cikuma, kuhuminina kuintsi lia mitima yeni. 23 Muomu munasemuka lualuha, keti mbuto yakupola, vuno honi ije kuye kupola, kuhitila mu kuyoya nakuniunga lizi lia Njambi. 24 Muomu visoneka vihandeka nguavio,

"Vantu voshe vapua ngue muila,

na vumpau vuavo vuoshe vunapu ngue vintemo via muila.

Muila uka jujuama, kaha vintemo viua,

25 vuno honi lizi lia Muene liapua lia yaye."

Kaha eli lizi likelio Muzimbu Uacili uje vambuilile kuli yeni.