1 Ijeni honi, yeni vaka kufuka, lileni na kumbolozoka muomu ya vukalu vuje vuli nakuija hali yeni. 2 Vufuko vueni vunavolo laja na vuzalo vueni vunaliua laja ku tuntembulu. 3 Ngolinde na siliva yeni ili na nkalaue, kaha nkalaue yayo ikapua vukaleho hakati keni, kaha ikalia mivila yeni ngue tuhia. Munalitulikila vufuko mu matangua akumanusuila. 4 Taleni, yeni kumuafuetele vaje vaka vipangi vaje vapangele mu mehia eni, ije fueto ya vaje imuambatele muvungumba ili na kulila muomu yeni. Kaha kulila ca vaje vaka kuteja cinahete ku matuitui a Muene Uanzili yoshe. 5 Munayoyo ha mavu vuyoye vua senga na kuvuahelela, muahindalesa mivila yeni ha litangua lia kumitsiha. 6 Munahisa, nakutsiha muntu ua vusunga, uje kamiluisile.

7 Nankuma, simpeni vamuanetu, kuvanga noho kuija ca Muene. Taleni, ndimi akavandamena vushuka vuacili vuje vukahumu ha mavu, akasimpi kuvanga noho vuje vushuka vunatambula kalunga uakulivanga na uakumanusuila. 8 Neni naua pueni vakusimpa na kuimana ngoo, muomu kuija ca Muene cili muyehi. 9 Vamuanetu, keti mulinieniete hali umo na mukuavo, linga keti vakamisompe. Taleni, Muka kusompa nemana ku vikolo. 10 Vamuanetu, kusetekesa na cimueso ca kuyanda nakusimpa, tuyeni tucisetekese na tunanguizi vaje vahandekele mu lizina lia Muene. 11 Taleni, tukatumbula vaje nguetu vaka kuvuahelela vaje vakele nalukakateya. Munovu kusimpa ca Yombi, kaha muamono visinganieka via Muene, muje vati Muene uapua ua ngozi na cikeketima.

12 Vuno honi ha vioshe evi, vamuanetu keti mulisinge, cipue na lilu cipue na mavu cipue kulisinga na coshe cisingo, vuno honi eyo yeni, ipue eyo na houe yeni, ipue houe, linga keti vaka mihise.

13 Nkuma kuli umo hakati keni uje ali na kuyanda ndi? Kaha napande kulombela. Nkuma kuli umo navuahelela ndi? Kaha napande kuimba miaso ya kushangazala. 14 Nkuma kuli umo hakati keni uje ali nakuvavala ndi? Kaha napande kusana vakuluntu va cikungulukilo, kaha vamulombelele nakumuvuavesa na mazi mu lizina lia Muene. 15 Kaha lilombelo lia lutsilielo lika yoyesa uje muntu ali nakuvavala, kaha Muene akamukanguisa, nga nalingi vupi, vaka mukonekela. 16 Nankuma liambululeni vipi vieni kuli umo na mukuavo, nakulilombelela umo na mukuavo linga mukanguke. Lilombelo lia muntu muka vusunga lili nanzili cikuma kaha likakuasa cikuma. 17 Eliya uapuile yala mu vuntu ngue yetu kaha ualombelele cikuma linga kalunga keti anoke, kaha ha miaka itatu na vingonde vitanu na imo kalunga kanokele ha mavu. 18 Ambahoni ualombelele naua kaha lilu lia nokesele kalunga, kaha ha mavu hakele vushuka naua.

19 Vamuanetu, nga umo hakati keni ahuma ku vusunga kaha umo amuhiluisa, 20 napande kuzivuka nguendi uoshe uje ahiluisa muka vupi kukupenga penga ca vilinga viendi, akavola muono uendi kukutsa kaha vupi vuendi vuavuingi vaka vukonekela.