1 Yange Yakomba, ngamba ua Njambi na Muene Yesu Kilistu,

Vihindu ku miyati likumi na ivali ije ya lishandoka ha mavu oshe.

2 Vamuanetu, vitambuleni vioshe kupua ngue nzolela, omo muuana vieseko viakuliseza seza, 3 muomu muazivuka ngueni kueseka ca lutsilielo lueni cineha lukakateya. 4 Kaha eceleni lukakateya lumanese cipangi caluo, linga mupue vakukola nakushula kuakuhona cimo. 5 Nga umo ueni najena mana, mueceleni linga alombe kuli Njambi, uje muka kuhana vantu na mutima umo kuakuhona kutala ku vupi vuavo, kaha aka muhanavio. 6 Vuno honi napandele kulomba mu lutsilielo, kuakuhona kulikanouela, muomu uoshe uje alikanouela napu ngue linkimba lia cisali lije lipekumuka nakuya kuoshe kuje kuitonda mpunzi. 7 Muntu uje uacifua eci keti avandamene nguendi akatambula cimo kuli Muene. 8 Muomu muntu uacifua eci napu ua mitima ivali, kaha akataliangela mu vioshe akalingi.

9 Eceleni muanoko uakulikehesa linga alihalese omo Njambi amujundula. 10 Vuno honi muka kufuka napande kuvuahelela omo Njambi amukehesa, muomu akaua ngue vintemo via muila. 11 Muomu litangua likatuhuka na vitsantse vialio viakuyukuma nakuletuisa muila, kaha na vintemo viauo viua, kaha na vucili vuauo vunonga. Mucifua cimo vene na muka kufuka akanonga hakati ka mingoso yendi.

12 Uakukuisula muntu uje ahiana vieseko, muomu nga na vihiana, kaha akatambula cilongo ca muono cije Njambi nakulahesa kuli vaje vamuzanga. 13 Muntu keti ahandeke omo vamueseka nguendi, "Njambi ikeye nanjeseka." Muomu Njambi kuvekumueseka na vupi kaha na ikeye kekueseka muntu. 14 Vuno honi muntu uoshe vakamueseka omo vamukokela kueka na mashungu endi amapi. 15 Ambahoni lishungu omo limita kaha lisema vupi, kaha vupi omo vukola cikuma kaha vuneha kutsa.

16 Vamuanetu vanjazanga, keti vamikuise. 17 Cuma coshe cacili na vuana vua vusunga vikahumu kuilu, vikahuminina kuli Tate ua vieke ikeye uje kekutenguluka ngue mu cikatenguluka cimbembe. 18 Mucizango cendi vavenia uatutangele na lizi lia vusunga linga tupue cifua ca vushuka vuakulivanga ku via kutanga viendi.

19 Zivukeni eci, vamuanetu vanjazanga. Muntu uoshe napande kuvua vuasi, kaha akotokele mukuhandeka, kaha naua akotokele mukuniengua, 20 muomu kuniengua ca muntu kucekuneha vusunga vuje vuatonda Njambi. 21 Nankuma, umbileni viuma vioshe via mazilo na vilinga via vipi kaha mukulikehesa tambuleni lizi lije vanakunu muli yeni, lije liasa kuovola miono yeni.

22 Keti mupue vaka kuvua lika lizi, nakulikuisa yeni vavenia. Vuno honi lingeni na vije vilihandeka. 23 Muomu nga umo apua muka kuvua lika lizi vuno honi kekulinga vije vilihandeka, kaha napu ngue muntu uje ali nakulitala cihanga cendi ha kalivanjelo, 24 kaha hanima yakulitala ikeye vavenia, kaha aya, omo aya hajevene asuva muje muanamonekela. 25 Vuno honi uoshe atala ha lishiko lia vusunga, lishiko lia kupatuka, na kukakateya, kupua muka kuvua uakuhona kusuva vuno honi muka kulinga vilinga, akapua ua kukuisula mu vilinga viendi.

26 Nga kuli umo asinganieka nguendi ikeye ualihana kuli Njambi, vuno honi kakuata ndaka yendi, akuisa mutima uendi, kaha vunjambi vua muntu ou vunapu vuangoco. 27 Vunjambi vua vusunga nakulela ku mesho a Njambi na Tate vukevuo ovu, vua kukuasa vantsiua na vantuluue mu makalu avo, nakulihumisa ikeye vavenia ku vupi vuahano ha mavu.