1 Vamuanetu, vaka kutsiliela muli Muene ua vumpau Yesu Kilistu keti mumuese kahangu. 2 Muomu nga muntu ali na tunzeya tua ngolinde kaha nazala na mu vuzalo viacili mu cikungulukilo ceni, kaha na yala ua cihutu uje nazala vuzalo vua kusanioka na ikeye naua eja mu cikungulukilo ceni. 3 Kaha nga mumuesa kasingimiko cikuma kuli muntu uje nazala vuzalo vuacili nakuhandeka ngueni, "Cituamo cacili cino ija utumameho," vuno honi muhandeka kuli uje yala ua cihutu ngueni, "Yove imana kuje," cipue ngueni, "Tumama ha mavu ku viliato viange," 4 kaha nkuma kumualingile kahangu hakati keni vavenia, nakupua vaka kusompa na visinganieka via vipi ndi?

5 Ivuilileni, vamuanetu vanjazanga. Nkuma Njambi kahanguile vaje vakuhutua ha mavu kupua vaka kufuka mu lutsilielo nakusuana vumuene vuje vuakulahesele vaje vamuzanga ndi? 6 Vuno honi kumua musingimikile uje yala ua cihutu. Nkuma keti muka kufuka ikeye akamiyandesa, nkuma keti vakevo vakamituala ku nzango na ku misompesa ndi? 7 Nkuma keti vakevo vaje vakashaula lizina lia kasingimiko lia ikeye uje kumuakundama ndi?

8 Nga cilivene muniunga lishiko lije lili mu visoneka ngualio, "Zanga mukueni ngue muje mu ualizanga yove vavenia," kaha mulina kulinga muacili. 9 Vuno honi nga mumuesa kahangu, kaha mulina kulinga vupi, kaha lishiko limihisa kupua vakakupokola lishiko. 10 Muomu uoshe uje aniunga mashiko oshe vuno honi nga apokolaho limo kaha alina mulonga ku oshe. 11 Muomu ikeye uje uahandekele nguendi, "Keti ulinge vupangala," kaha naua nguendi, "Keti utsihe." Nga kumualingile vupangala vuno honi mutsiha, munapu vaka kupokola lishiko. 12 Nankuma, handekeni nakulinga ngue vantu vaje va vakasompa na lishiko lia kupatula. 13 Muomu kusompa cakuhona cikeketima vakacimuesa kuli uje uakuhona cikeketima, kaha cikeketima cikahiana kusompa.

14 Nkuma cikuasa vikahoni vamuanetu, nga muntu ahandeka nguendi ali na lutsilielo, vuno honi kuakuhona vilinga? Nkuma lutsilielo luendi luasa kumuovola ndi? 15 Nga muanoko ua yala cipue muanoko uampuevo kesi na vuzalo cipue viakulia via ha litangua na litangua, 16 kaha nga umo ueni ahandeka kuli vakevo nguendi, "Yeni mu ciyulo, kaleni muntuima kaha mukalie na kukuta," kuakuhona ku vahana viuma vije vivatonda ku muvila, nkuma eci cikuasa vikahoni? 17 Mucifua cimo vene, lutsilielo halukalialuo nga kuluesi na vilinga, lunatsi.

18 Vuno honi umo akahandeka nguendi, "Yove uli na lutsilielo kaha yange njili na vilinga." Njimuese lutsilielo luove kuakuhona vilinga, kaha yange njikakumuesa lutsilielo luange ha vilinga viange. 19 Unatsiliela nguove Njambi uapua umo lika. Muacili! Cipue vene mahamba vatsiliela kaha vakajaja na liova. 20 Yove cilema, nkuma utonda vukaleho ngeci lutsilielo lua kuhona vilinga luapua luangoco ndi? 21 Nkuma keti tatetu Avilahama ivapuisile ua vusunga ha vilinga, omo uatondele kulambuila munendi Isake ha mutula ndi? 22 Kaha muamono ngueni lutsilielo luendi na vilinga viendi viakele nakupangela hamo, kaha na lutsilielo luendi luapuile lua kutungukua na vije vialingile 23 kaha visoneka via lishulisisile vije vihandeka nguavio, "Avilahama uatsilielele Njambi kaha vamutumbuile kupua ua vusunga." Kaha vamutumbuile naua kupua kavusamba ua Njambi. 24 Kaha muamono ngueni muntu vakamupuisa ua vusunga na vilinga keti na lutsilielo lika.

25 Kaha mucifua cimo vene, nkuma keti Lahave uje cikuizi vamupuisile ua vusunga mu vilinga viendi omo uatambuile vaje vavatumine, kaha uavalekele linga vahiluke mukulikuasesa ngila yeka ndi?

26 Mungila imo vene, muvila nga ulihangununa na cimbembesi kaha unatsi, kaha mucifua cimo vene lutsilielo luakuhona vilinga lunatsi.