1 Vamuanetu, keti vuingi vueni mupue valongisi, muomu muazivuka ngueni yetu vaka kulongesa vaka tusompa cikuma na vukalu. 2 Muomu tuva voshe tukapihisa viavingi, kaha nga kuli umo kekupihisa mu vihandeka viendi kaha napu yala uavusunga, kaha naua asa nakuniunga muvila uendi uoshe. 3 Nga tuhaka vikuvo mu tunua tua tuvalu linga vatuononoke, tuasa kuvalinga kuya kuoshe kuje tutonda kuya. 4 Taleni ha mato akama naua, cipue vene akama akapekumuka na mpunzi yakama, vuno honi vaka atuamenena na cikasi cacindende ca kulipasha, kaha vukayi kuoshe kuje mukakuendesa atonda linga vuye. 5 Mu cifua cimo vene na ndaka yapua cilio cacindende ku muvila, vuno honi ikalihalesa ha viuma viakama. Singaniekeni ha musenge uakama uje ukauema na tuhia tuatundende! 6 Kaha ndaka inapu tuhia. Kaha ndaka naua inapu mavu a vupi hakati ka vilio via muvila. Ikapihisa muvila uoshe, ikashuameka tuhia ku muono uoshe ua muntu, kaha na ikeyo vakaishuameka mu tuhia mu ngehena. 7 Muomu cifua coshe ca vikashama na tuzila, na tusitu vakulikoka ha mavu na viakutanga via mu cisali viasa kuniungiua kaha naua vanavaniungu laja ku muntu, 8 vuno honi naumo uahi muntu asa kuniunga ndaka. Vupi vuje kuvuekuhuima, vuashulu na vusungu vuakutsiha. 9 Na ndaka tukalemesa Muene na Tate, na ikeyo naua tukasingi vantu, vaje Njambi uatangele mucifua cendi. 10 Mu kanua kamolika vene mukemo mukahumu kukuisula na kusinga. Vamuanetu, eci kucapandele kupua ngoco. 11 Nkuma livuelu vuelu likahumisa mema akushasha na acili ha ntsimbu imo lika ndi? 12 Vamuanetu, nkuma muti ua mukuyu uasa kuima vushuka vua Olive, cipue muti ua viniu uasa kuima vushuka vua mukuyu ndi? Nalimo liahi lisima lia mema a muongua liasa kuhumisa mema acili.

13 Nkuma iya ali na mana nakuvuisisa hakati keni? Ha vuyoye vuendi vuacili eceleni linga amuese vipangi viendi mukulikehesa ku mana. 14 Vuno honi nga uli na cipululu cacipi na visinganieka via kulizanga mu mutima uove, keti ulihalese kaha upue ua makuli ku vusunga. 15 Aua mana kahumu muilu, vuno honi aha mavu, akuhona kulela, a mahamba. 16 Muomu kuje kuli cipululu na visinganieka via kulizanga, kukeko naua kuje kukakala naua nakupihisa na vilinga vioshe via vupi. 17 Vuno honi mana aje akahumu kuilu akeuo apua akulivanga ku kulela, ambahoni ciyulo, na kulikehesa, na kulihana, na kushula na cikeketima na vushuka vuacili, cakuhona kulikanouela na civembulu. 18 Kaha kuteja ca vusunga vaka cikunu mu ciyulo kuli vaje vaka kulinga ciyulo.