1 Nkuma vika vikanehe nzita, kaha nkuma vika naua vikanehe kulua hakati keni? Nkuma keti mashungu eni akeuo ali ku nzita hakati ka vantu veni ndi? 2 Muka shunguiya vuno honi ku muesi navio, mukemo honi mukatsihi. Kaha mukavitondo cikuma vuno honi kumuekuviuana, nankuma mukemo mukalu na kulinga nzita. Kumuesi navio muomu kumue kulomba. 3 Mukalombo vuno honi kumue kutambula, muomu kumue kulomba muje mucayilamo, muomu mukalikuasesavio muje muaya mashungu eni. 4 Yeni vantu vakuhona kulongua! Nkuma ku muazivukile ngueni kulinga vusamba na vaka mavu cinapu vutozi na Njambi ndi? Nankuma, uoshe uje atonda kupua kavusamba ua vaka mavu alipuisa ikeye vavenia kupua citozi ua Njambi. 5 Cipue nkuma musinganieka ngueni visoneka vikahandeka viangoco omo vihandeka nguavio, "Njambi ashunguiya mu lifuua ha cimbembesi uje uakala muli yetu ndi?" 6 Vuno honi akahana kavumbi kakama, nankuma visoneka vihandeka nguavio, "Njambi akaluisa kulihalesa, vuno honi akahana kavumbi kuli vaka kulikehesa."

7 Nankuma, lihaneni yeni vavenia kuli Njambi. Luiseni Liyavolo kaha akateua kuli yeni. 8 Shueneni kuyehi na Njambi kaha na ikeye akashuena kuyehi neni. Leleseni mavoko eni, yeni vaka vupi, kaha leleseni mitima yeni, yeni vantu va mitima ivali. 9 Pueni vaka kumbolozoka, lileni na kusikoka. Eceleni kujola ceni cipue kulila kaha nakuvuahelela ceni cipue kulisimoka. 10 Likeheseni yeni vavenia ku mesho a Muene kaha akamijundula.

11 Vamuanetu keti muhandeke via vipi kuli umo na mukuavo. Uoshe uje ahandeka via vipi kuli munaina cipue kusompa munaina, kaha ali nakuluisa lishiko na kusompa lishiko. Vuno honi nga usompa lishiko, kaha yove kuue kulinga vije lishiko litonda vuno honi umukakulisompa. 12 Kuli umo lika muka kuhana lishiko na kusompa, uje asa kuovola na kunongesa. Nkuma yove iya linga usompe mukueni?

13 Ijeni honi, yeni vaje mukahandeka ngueni, "Lelo cipue imene, tuya kuje na kuje ku nganda nakukalako muaka nakukalingilako mingoso linga tuuaneko nganio." 14 Muomu kuuzivuka via imene. Vuyoye vuove muje muvukafua? Yeni munapu mbundu ije ikalako lika kantsimbu kakandende kaha ihua. 15 Vuno honi munapande kuhandeka ngueni, "Nga cizango ca Muene citava, tukayoya kaha tukalinga eci na cije." 16 Vuno honi yeni mukalihalesa nakulipamba. Kaha kulihalesa coshe eci cinapu vupi. 17 Uoshe uje azivuka kulinga via vusunga kaha ahonoua kuvilinga, muomu kuli ikeye asinganieka nguendi vinapu vupi.