1 Yange Simoni Petulu, ngamba na kanganda ua Yesu Kilistu.

Kuli vaje vanatambula lutsilielo luakupua hamo mukuimana nolu luetu mu vusunga vua Njambi yetu na Muyoyesi Yesu Kilistu.

2 Kavumbi na ciyulo vikale muvuingi kuli yeni mu mangana a Njambi na a Yesu Muene uetu.

3 Nzili yendi ya vusunga inatuhana viuma vioshe vije viapandama ku muono na ku vunjambi, kuhitila mu mana endi uje ua tusanene ku vumpau naku vucili vuendi, 4 vikevio vije via natuhana yetu vije viendi via seho na vikulaheso viakama, ngeci linga kuhitila muli vikevio linga muase kuteua ku vupi vuakama vuje vuli ha mavu muomu ya mashungu a vipi, kaha mukakala na mutambela mu vunjambi. 5 Muomu ya cuma eci pangeni na nzili yoshe muku vuezelelako ku lutsilielo lueni na vucili, na vucili na mana, 6 naku mana akulihilula kaha na kulihilula ca lukakateya, na lukakateya lua vunjambi, 7 kaha naku vunjambi vua cizango cavu Kilistu, kaha cizango cavu Kilistu cikale na cizango. 8 Muomu nga viuma evi vinapu vieni kaha muli navio muvuingi, kaha vikami lingisa kupua vaka kupanga nava kakuima vushuka mu mana eni hali Muene uetu Yesu Kilistu. 9 Muomu uoshe uje ahona kukala nevi viuma napu kapuputua kaha naua muka kumuena muyehi kaha nasuvu ngeci va mulelesele ku vipi viendi via laja.

10 Nankuma, vamuenetu, pangeni na nzili yoshe linga mumuese kusana na kuhangula ceni, muomu nga mulinga eci kaha kumukahilukila munima, 11 nankuma vakamitambula muacili mukukovela mu vumuene vua ya yaye vua Muene uetu na Muyoyesi Yesu Kilistu.

12 Nankuma ntsimbu yoshe njikatondo ku mianukisa viuma evi, cipuevene mua vizivuka kaha va vipanga mu vusunga vuje mulinavuo. 13 Njasinganieka cinapu cacili, omo njicili mu muvila ou, mukumihindula na cuma ca kumianukisa, 14 muomu njazivuka ngeci vuavuno njikashulula muvila ou, ngue muje mua njimueseleco Muene uetu Yesu Kilistu. 15 Kaha njikalinga muoshe muje munjaselamo ngeci hanima ya kuya cange kaha mukasa kuvuluka viuma evi ntsimbu yoshe.

16 Muomu ku tuakavele visimo viakuhuma ku vantu omo tuambuilile kuli yeni nzili na kuija ca Muene uetu Yesu Kilistu, vuno honi tuapuile tu vakaleho va vumuene vuendi. 17 Muomu muje muatambuile kasingimiko na vumpau kuhuma kuli Njambi Tate na lizi liahumine kuli uje Muene ua Vumpau nguendi, "Ou ikeye munange injazanga, muli ikeye njivuahelela," 18 Tuovuile eli lizi lihuma muilu, muomu tuakele nendi ha munkinda ua kulela. 19 Kaha tuli na lizi lia vunanguizi lia vusunga cikuma. Mukalinga muacili kuhakela mana kuli eci ngue ku ndeya ije ilinakutuila ceke mu cihela ca milima, kuvanga noho kukutuhuka ca litangua kaha na ntanga ntanga ya cimene ihinduka mu mitima yeni. 20 Cakulivanga ku vioshe munapande kuzivuka eci, ngeci kukuesi vunanguizi vua visoneka vuje vuezile omo ya kunungulula ca muntu likaliendi, 21 muomu kukuesi vunanguizi vuahumine ku cizango ca muntu, vuno honi vantu va vendesele na Cimbembesi Uakulela uje uahandekele via kuhuma kuli Njambi.