1 Vamuanetu tutualeleniho kulizanga umo na kuavo. 2 Keti muecele kutambula vangenzi, muomu vamo vatambuile tungelo cakuhona kuzivuka. 3 Vulukeni vaje vali mu kamenga ngue neni muli hamo navo mu kamenga, na vaje vavali nakuyandesa cikuma, muomu neni naua muli mu vuntu. 4 Eceleni vulo muvuambate mukasingimiko hakati keni voshe, kaha keti mujualese muhela ua vulo, muomu Njambi a kasompa vakakulinga vukuizi na vupangala. 5 Humiseni vuyoye vueni ku cizango ca vimbongo, kaha puisenimo na viuma vije vimulinavio, muomu ikeye nahandeka nguendi, "Kunji kamihonoua cipue kumiseza." 6 Nankuma tuhandeka na kusimpa nguetu,

"Muene ikeye mukuasi uange,

kunjikevu liova,

nkuma muntu alinga vika kuli yange?"

7 Vulukeni vantuama veni, vaje vahandekele kuli yeni lizi lia Njambi, singaniekeni viahumine ha vuyoye vuavo, kaha temunuineni lutsilielo luavo. 8 Yesu Kilistu uapua umo lika izau na lelo na miaka yoshe ya yaye. 9 Keti vamitangule na vieka na vilongesa via vungenzi, muomu capua cacili linga mutima vaukolese na kavumbi, keti na viakulia vije kuviesi na seho. 10 Tuli na mutula uje vaje vaka kupanga mu mbalaka kuvesi nakapandi kakulilako. 11 Muomu mivila ya vaje tusitu vaje maninga avo aje avananeha mu cihela ca kulela kuli kasasendote uakama kupua nkombelo ya vupi vaka auemekela hambanza lia cilombo. 12 Mu ngila imo vene na Yesu naua uayandelele hambanza lia cilombo linga a lelese vantu kuhitila mu maninga endi. 13 Nankuma tuyeni kuli ikeye hambanza lia cilombo, tukevue shuamua ije yevuile. 14 Muomu kuno kutuesi na nganda ya yaye, vuno honi tuli na kutonda nganda ije ili nakuija. 15 Ambahoni kuhitila muli ikeye tuyeni tutualeleleho kuhana nkombelo ya kushangazala kuli Njambi, ije ikeyo vushuka vua tunua tuje tuzivuka lizina liendi. 16 Keti mulikele kulinga viacili kaha lipangeleni vije vimuli navio, muomu vinkombelo evi vikavuahelesa Njambi. 17 Ononokeni vantuama veni kaha lihaneneni kuli vakevo, muomu vali na kuminiungilako miono yeni, ngue vamala vaje vakahana vukaleho. Eceleni valinge eci na nzolela keti nakuniengua, keti ngoconi cikapua ca kuhona seho kuli yeni.

18 Tulombeleleni, muomu cilivene tuazivuka nguetu tulina visinganieka via vusunga, tukashunguiya kulinga viuma vioshe mukasingimiko. 19 Njimilambelela cikuma kulinga eci linga njihiluke kuli yeni vuavuno.

20 Honi Njambi ua ciyulo uje kuhitila ha maninga a litavasano lia yaye uahiluisile Muene uetu Yesu kuhuma ku vatsi, uje Kaniungi Uakama ua vampanga, 21 amihane viuma vioshe viacili linga mulinge cizango cendi, apange muli yeni vije vimuvuahelesa ku mesho endi, kuhitila muli Yesu Kilistu, kuli ikeye kukale vumpau vua miaka ya yaye. Ameni.

22 Vamuanetu njimilambelela nguange, ivueni ku lizi liange lia kumikolesa, muomu njamisonekela lika muvuihi. 23 Munapande kuzivuka ngeci muanetu Timateo vana muhumisa mu kamenga, nga eja vuavuno kaha njikeja nendi linga tuakumimone.

24 Menekeni va ntuama veni voshe na vantu va kulela va Njambi. Vantu vaje vahuma ku Itali vanamitumu vihindu. 25 Kavumbi kakale neni voshe. Ameni.