1 Muomu lishiko lia Mosesa likelio cimbembe ca viuma viacili vije vili nakuija keti ngue mu cifua ca vusunga cevi viuma, kucikalingiua, ha vinkombelo viakulifua vije vivakakombelela kutualelelaho ha muaka na muaka, ije ikapuisa vusunga vaje vashuena muyehi. 2 Ngue ngoconi, nkuma ngue kuvalikelele ku valinga nkombelo ndi? Nga vaka kulemesa vavalelesele laja, kaha ngue kuvali shoshomuene naua mulonga ua vipi. 3 Vuno honi ha vinkombelo evi hali civulukiso ca vupi ha muaka na muaka. 4 Muomu capua cacikalu maninga a vangombe va vankomba na vampembe kuhumisa vipi.

5 Nankuma, omo Kilistu uezile hano ha mavu, uahandekele nguendi,

"Vinkombelo na milambu kuuavitondele,

vuno honi uanjivuaheselele muvila,

6 mu milambu ya kutsimika

na milambu ya vupi vioshe kuvia kuvuahelesele.

7 Kaha njahandekele nguange, ‘Njineja nakulinga cizango cove, Njambi yange,

ngue muje vanacisoneka hali yange mu livulu liakuzenga.’"

8 Omo uahandekele ha kulivanga nguendi, "Yove kuuazangele cipue kuvuahelela mu vinkombelo na milambu na milambu yakutsimika na milambu ya vupi" (evi vakavikombelela kuya ku lishiko lia Mosesa), 9 kaha uatualeleho kuhandeka naua nguendi, "Tala, njineja nakulinga cizango cove." Uamanusuile vinkombelo viakulivanga linga anehe nkombelo ya mucivali. 10 Kaha ha vukaleho vuje vanatulelesa kuhitila mu nkombelo ya muvila ua Yesu Kilistu lumo lika kunahu.

11 Kasasendote uoshe ha litangua na litangua akayi kuvipangi viendi mukuhana vinkombelo viakulifua, vije kuviasa kuhumisa vipi. 12 Vuno honi omo Kilistu uahanene nkombelo imo lika ya ntsimbu yoshe ya vipi, uatumamene ku livoko liacilio lia Njambi, 13 mukuvandamena kuvanga noho vitozi vendi vavapuise cituamo ca viliato viendi. 14 Muomu ha nkombelo imo nalelesa cikuma voshe vaje vanalele.

15 Kaha Cimbembesi Uakulela naikeye naua ahana vukaleho kuli yetu, hanima yakuhandeka nguendi,

16 "Eli likelio litavasano linjikapanga navo

hanima ya matangua aje, muanahandeka Muene,

Njikahaka mashiko ange mu mitima yavo,

nakuuasoneka mu mana avo."

17 kaha naua uatualeleleho kuhandeka nguendi, "Kunjikavuluka vipi viavo na vilinga viavo via vipi naua." 18 Haje hali cikonekelo ha viuma evi, kukuesi naua nkombelo ya vupi.

19 Nankuma, vamuanetu muomu tunasimpi mukukovela mu Cihela Cakulela ha maninga a Yesu, 20 ha ngila yaiha na kuyoya caciha vije viatushokoluelele Kilistu kuhitila mu ntanga yakufuika ha civumbe, ikeyo ije kuhitila mu muvila uendi ua ntsitu, 21 kaha muomu tulina kasasendote uakama cikuma uje endesa njivo ya Njambi, 22 tushueneni muyehi na mutima ua vusunga mukushula na vusunga vua lutsilielo, na mitima yetu ije ivanalelesa ku mana a vupi na mivila yetu ije ivanakushu na mema akulela. 23 Tuyeni tukuatelele ngoo mukulitava ca kutsiliela cetu cakuhona kutaliangela muomu uje uatukulahesele uapua uakulongua. 24 Kaha tuyeni tulikolese umo na mukuavo muku lizanga na mu vipangi viacili, 25 keti muyengule kuliuana hamo ngue muje muvakalingi vamo, vuno honi lisimpiseni umo na mukuavo, na kutualelelaho ntsimbu yoshe ngue muje munamono ngueni Litangua lia Muene lilinakushuena muyehi.

26 Muomu nga tulinga vupi mu cizango cetu hanima yakutambula mana a vusunga, kaha kukuesi naua nkombelo yakuhumisa vipi, 27 vuno honi liova lia kusompa, na litende lia tuhia lije lika tsimika vitozi. 28 Muntu uje nashaula lishiko lia Mosesa atsa cakuhona cikeketima ca vukaleho vua vantu vavali cipue vatatu kupua vakaleho. 29 Kakapua hali kashitiko kausinganieka kavakahana kuli muntu uje nashaula Muna Njambi, na kupopolola maninga a litavasano aje alelesele, kaha anienguesa Cimbembesi ua kavumbi? 30 Muomu tumuzivuka uje uahandekele nguendi, "Kulingula capua cange, njikafueta," Kaha naua, "Muene akasompa vantu vendi." 31 Cinapu cuma cakuteuesa cikuma kuuila mu mavoko a Njambi ua kuyoya.

32 Vuno honi vuluka matangua akunima, omo hanima yakumimuesa ceke, muahianene vukalu na tuyando, 33 vintsimbu vimo vakele nakumishaula mutania muelu na kumiyandesa, kaha naua mu vintsimbu vimo muakele nakukalahamo navaje vavakele nakuyandesa. 34 Muomu muakele na cikeketima hali vinzinda, kaha muajolele ha kutambula vufuko vueni vuje vuazimbalele, muomu muazivukile ngueni yeni vavenia muli na vufuko vuacili vuje vukatumama ntsimbu yoshe. 35 Nankuma keti muecele kusimpa ceni, cije cili na vuana vuakama cikuma. 36 Muomu munapande kukakateya, ngeci mulinge cizango ca Njambi nakutambula vije vianakulahesa. 37 Ngue muje muvihandeka visoneka nguavio,

"Muomu ka ntsimbu kakandende lika,

kaha uje akeja, akeja

cakuhona kusimbula,

38 vuno honi vantu vange vaka vusunga vakayoya ha lutsilielo,

kaha nga ahilukila munima,

muono uange ku ukavuahelela muli ikeye."

39 Vuno honi keti yetu vaje vakakuhilukila munima na kutunongesa, vuno honi vaje vali na lutsilielo nakutulika miono yavo.