1 Honi cipue litavasano liakulivanga liakele na mashiko a kulemeselamo na cihela cakulela ca ha mavu. 2 Muomu mbalaka uaitungile, kaha cihela ca hambanza, muje muakele citumbiko ca vindeya na mesa ya mbolo yakulambuila kuli Njambi, cihela cije vacitumbuile nguavo Cihela Cakulela. 3 Kunima ya ntanga ya mucivali kuakele mbalaka ije vatumbuile nguavo Cihela Cakulela Cikuma. 4 Muje mu cihela muakele mutula ua ngolinde ua kutsimikila ngongosi ya luengo luacili na cikasa ca litavasano viakufuika vioshe na ngolinde, vije viakele na njava ya ngolinde ije yakele na maana, na mbueti ya Alone ije yasokele, na mavue akulipasha haje ha vacokuele visona via litavasano, 5 kaha helu liayo hakele vakelumbi va vumpau vaje vafuikile cituamo ca cikeketima. Ha viuma evi kutuvihandeka honi mukulova.

6 Omo viuma vioshe evi vinahu kuvivuahesa, vasasendote vatualelelaho kuya mu mbalaka ya hambanza, nakulinga vipangi viavo, 7 vuno honi mu mbalaka ya mucivali kasasendote uakama lika ikeye akakovelamo, lumo ha muaka, oku nambata na maninga akulinga nkombelo yendi vavenia neyi ya vipi via vantu. 8 Na Cimbembesi Uakulela uje amuesa ngeci ngila yakuya ku Cihela Cakulela kanda vaishokolole kaha mbalaka ya hambanza hanga inemana ngocovene, 9 (eci cinemanena ntsimbu ino vene) Kuya muvana vivuaheselelamo evi, mavuana na vinkombelo vakavikombelela vije kuviasa kulelesa mana a muka kulemesa, 10 vuno honi vikapanga lika na viakulia na viakunua na vikuavo viakuliseza seza, na mashiko a ha muvila kutuala noho ha ntsimbu ya kutenguluka.

11 Vuno honi omo Kilistu uezile kupua ngue kasasendote uakama ha viuma viacili vije vineja, kaha kuhitila ha vukama na kulela ca mbalaka (keti yakupanga na mavoko, kulumbununa ngeci, keti yakutanga cino) 12 uakovelele lumo lika mu Cihela Cakulela, kakovelele na maninga a vampembe cipue a vana va vangombe vuno honi na maninga endi vavenia, mukututambuila kuovoka ca yaye. 13 Muomu nga vashamuinine vantu vaka kujuala na maninga a vampembe na a vangombe valuhavo na muto ua muna ngombe uakukombelela ha kulilelesa ca muvila, 14 kaha cikafua vati honi ha maninga a Kilistu, uje kuhitila mu Cimbembesi ua yaye ualilingile nkombelo ikeye vavenia kuakuhona kapenga kuli Njambi, lelesa mana ove ku vipangi via kutsa linga upangele Njambi uakuyoya.

15 Nankuma Kilistu napu muka kutuimanenako mu litavasano lia liha, linga vaje vavanasana kuli Njambi vatambule cikulaheso cakusuana ca yaye, muomu kutsa cineja ngeci civamene ku vipi vioshe mu litavasano liakulivanga.

16 Muomu vusuana kuvuasa kukalako, kuvanga uje liavenia ivasuana natsi. 17 Muomu vusuana vukakala lika na nzili ha kutsa, nga uje vavenia aciyoya kaha vusuana kuvuesi na nzili. 18 Ngeci vene cipue litavasano lia laja kuliasele kupanga kuakuhona maninga. 19 Omo kushika coshe ca lishiko vacihandekele kuli Mosesa ku vantu voshe, uambatele maninga a vana va vangombe na a vampembe, na mema na vuanda vua kuvenga na kacishamu ka isope, nakushamuina ha livulu na ku vantu voshe, 20 kaha uahandekele nguendi, "Aua akeuo maninga a litavasano aje Njambi uamishikile." 21 Kaha mu cifua cimo vene uashamuinine maninga ha mbalaka na vitenga vioshe viakulikuasesa mukulemesa. 22 Cilivene muintsi lia lishiko lia Mosesa keti viuma vioshe vavilelesa na maninga, kaha cakuhona kuitila maninga ngue kukuesi kukonekela ca vipi.

23 Kaha cinapande mikanda ya viuma via muilu kuilelesa, nevi vilika, vuno honi viuma via muilu vikevio vavenia vialihana laja nkombelo yacili kupulakana evi. 24 Muomu Kilistu nakovela, keti mu cihela cakulela cakupanga na mavoko a vantu houe, cifua ca vusunga, vuno honi muilu mukemuo vene, kaha akasholoka ku mesho a Njambi mukuimanena yetu. 25 Kilistu ikeye kalihanene vavenia kuhilukila, ngue kasasendote uakama uje akakovela mu Cihela Cakulela ha muaka na muaka na maninga aje keti endi. 26 Muomu nga ngoco ngue uayandele kuhilukila nakuhiluka hume ha luvula lua mavu. Vuno honi omu mucilimo, uasholokele lumo lika kunahu kutuala kumamanusuilo a ntsimbu yoshe linga amanese vupi mukulilinga ikeye vavenia nkombelo. 27 Kaha ngue muje muvanacihanguila ha vantu kutsa lumo, kaha kuhuma haje kuija cisompelo, 28 mungila imo vene Kilistu ha kumuhana kupua nkombelo lumo mukuambata vipi via vavengi, akasholoka naua lua mucivali, keti kuija nakuhumisa vipi houe, vuno honi mukuovola vaje vanamuvandamena.