1 Nankuma, vamuanetu vakulela, vaje tulipangela mukusana ca muilu, yongoleni Yesu, kanganda na kasasendote uakama mukutava cetu. 2 Uapuile uakulongua kuli uje uamuhanguile, ngue muje Mosesa uapuile uakulongua mu njivo ya Njambi. 3 Yesu alina kasingimiko kakama cikuma ka vumpau kupulakana Mosesa, ngue muka kutunga njivo ali nakasingimiko cikuma kupulakana njivo. 4 (Muomu njivo yoshe vaitunga ku muntu, vuno honi muka kutunga viuma vioshe uapua Njambi) 5 Honi Mosesa uapuile uakulongua ku vioshe mu njivo ya Njambi hakupuako ngamba, hakuhana vukaleho ku viuma vije vakahandeka kulutue, 6 vuno honi Kilistu uapuile uakulongua mu njivo ya Njambi hakupua Muana. Kaha yetu tunapu njivo yendi nga tukakateya mukusimpa cetu na kulihalesa mukutsiliela cetu.

7 Nankuma, ngue muahandeka Cimbembesi Uakulela nguendi,

"Lelo, omo muvua lizi liendi,

8 keti mukolese mitima yeni ngue vaje vaka kutengulukila,

ngue ha litangua lia vieseko mu mpambo,

9 kuje vakukuluila veni vanjesekele

kaha vamuene vipangi viange ha miaka makumi auana.

10 Nankuma, njanienguelele ntanga ije,

kaha njahandekele nguange, ‘Ntsimbu yoshe mitima yavo ili kulahako,

kuvazivukile vingila viange.’

11 Ngue muje njalisingile mu vutenu vuange nguange,

‘Kuvakakovela mukuhuima cange!’"

12 Liniungeni vamuanetu, keti umo hakati keni akale na vupi, mutima uakuhona kutsiliela, uje umihumisa kuli Njambi ua kuyoya. 13 Vuno honi munapande kulikolesa umo na mukuavo ha litangua na litangua, lije livatumbula nguavo "lelo," nga mulinga evi naumo uahi ueni ivakakuisa na vupi na kupua uakukaluua. 14 Muomu tuva voshe tuli nakupangela hamo muli Kilistu, nga lika tukakateya ku kusimpa cetu cakulivanga kuheta nakuntsongo, 15 Ngue muje vacihandeka nguavo,

"Lelo, omo muvua lizi liendi,

keti mukolese mitima yeni ngue mumualingile mukutengulukila Njambi."

16 Nkuma veya vaje vovuile kaha vamutengulukilile? Nkuma kuvapuile voshe vaje vahumine mu Ingito vaje vakele nakutuamenena Mosesa ndi? 17 Nkuma veya vaje Njambi uanienguelele ha miaka makumi auana? Nkuma keti vaje valingile vupi, vaje vatsililile mu mpambo ndi? 18 Kaha nkuma kuli veya vaje ualisingile nguendi kuvakakovela mukuhuima cendi, vuno honi nkuma keti kuli vaje kuva muononokele ndi? 19 Nankuma tumona nguetu kuvasele kukovela muomu yakuhona kutsiliela cavo.