1 Muomu uoshe kasasendote uakama vanamuhangula hakati ka vantu na kumuimika linga apangele vantu mu vipangi via Njambi, kuhana mavuana na kulinga vinkombelo via vipi. 2 Na mutima ua kulikehesa asa kukuasa vaje vaka nzimba na vaka kuvulumuna milonga, muomu na ikeye vavenia uapua uakuzeya. 3 Muomu yeci nalihana kukombelela nkombelo ya vipi viendi vavenia na via vantu. 4 Kaha na umo uahi asa kulihana kasingimiko ikeye vavenia, vuno honi nga Njambi na musana, ngue muasanene Alone.

5 Nankuma mungila imo vene Kilistu kalijunduile ikeye vavenia kulipuisa kasasendote uakama cikuma, vuno honi vamuhanguile kuli ikeye uje uahandekele kuli ikeye nguendi,

"Yove unapu u Munange,

lelo njinapu nji Isho,"

6 ngue muahandeka naua mu cihela cikuavo nguendi,

"Yove ukapua ukasasendote ua yaye,

ngue muje muapuile Melekizendeki."

7 Mu matangua a vuntu vuendi, Yesu ualombelele nakuihula, na lizi liakutambeka na masozi, kuli uje asa kumuovola ku kutsa, kaha vamuvuile muomu ikeye uakele nakuvuila Njambi liova. 8 Cipue vene uapuile Muana, vuno honi ualilongesele kuononoka kuhitila muje muayandelelemo, 9 hakupua uakulela ikeye uapuile ntsina ya kuovoka ca yaye kuli voshe vaje va muononoka, 10 hakumusholola kuli Njambi kupua kasasendote uakama ngue muje muapuile Melekizendeki.

11 Ha cuma eci tuli na viavingi viakuhandeka vije naua viavikalu kulumbununa, muomu munapu vaka kuhona kuvua. 12 Munapandele ha ntsimbu ino ngue munapu valongisi, mutonda muntu umo amilongese naua vilongesa viakulivanga via mezi a Njambi. Mucitonda mavele, keti via kulia viakukola, 13 muomu uoshe uje ayoya ha mavele kanda akole mu lizi lia vusunga, muomu napu kanike. 14 Vuno honi via kulia via kukola vinapu via vaje vanakolo mu mana, kuli vaje vavanalongesa kuhangununa vucili ku vupi.