1 Honi lutsilielo lukeluo vusunga vua viuma vije tutsiliela, vukaleho vua viuma vije kutumono. 2 Muomu ya lutsilielo vantu vakulaja Njambi uavatambuile.

3 Kuhitila mu lutsilielo tunevuisisa nguetu mavu va atangele na lizi lia Njambi, ngeci vije vimoneka vavipangele ha viuma vije kuvisholoka.

4 Kuhitila mu lutsilielo Avele ualambuile nkombelo ije yatevele Njambi kupulakana ya Kaine. Muomu ya ikeyo vamutambuile kupua ua vusunga kaha na Njambi uahanene vukaleho hakutambula mavuana endi, uatsile, vuno honi kuhitila mu lutsilielo luendi hanga acili nakuhandeka.

5 Kuhitila mu lutsilielo Inoke vamutualele muilu linga keti atse, kaha kuvamuuanene naua, muomu Njambi ikeye uamuambatele. Honi tele kanda vamuambate ikeye vamutumbuile nguavo umo uje uavuahelesele Njambi. 6 Kaha kuakuhona lutsilielo cacikalu kuvuahelesa Njambi. Muomu uoshe uje ashuena kuyehi na Njambi napande kutsiliela nguendi kuakala, kaha naua akahana mavuana kuli vaje valina kumutonda.

7 Kuhitila mu lutsilielo Noua omo vamunanguile kuli Njambi ha viuma vije kanda acimone, uononokele kaha uashongele vuato muje muvovokelele ikeye na ntanga yendi, mu ngila eyi vene mavu vahisile kaha uapuile suana ya vusunga vuje vukeja kuhitila mu lutsilielo.

8 Kuhitila mu lutsilielo Avilahama uononokele omo vamusanene linga aye ku cihela cije capandele kukatambula kusuana, kaha uayile kuakuhona kuzivuka kuje kuaya. 9 Kuhitila mu lutsilielo Avilahama uakapangele limbo liendi ku cihela cije civamukulahesele ngue ngenzi mu cifuti ca vungezi, uayoyele mu vintsingi na Isake na Yakomba, vaje vasuanene nendi cikulaheso ca cifua cimo. 10 Muomu ikeye uatalele kulutue lia nganda ije yakala na mavula aje mukaku atunga naku apanga ikeye Njambi.

11 Kuhitila mu lutsilielo Sala uatambuile nzili ya kuimita cipue vene tele nakuluvala, muomu uakele na lutsilielo hali uje uamukulahesele. 12 Nankuma kuhuma kuli yala umo, uje tele amoneka ngue natsi, kuasemukile vatekuluila vavengi ngue vintanga ntanga via muilu na vinona viakuhona kutanda via museke seke ua livu liaku ntunda ya cisali.

13 Voshe ava vatsile mu lutsilielo, cakuhona kutambula cije civa vavakulahesele, vuno honi muomu vacimuene vacimenekele tele cilikulahako, kaha hanima ya kulimona nguavo vapuile vangenzi na vaka kuenda hano ha mavu. 14 Muomu vantu vaje vahandeka viuma evi vamuesa nguavo vali nakutonda cifuti cavo. 15 Nga vakele nakusinganieka cihela cije kuvahumine, ngue vakele nakapandi kakuhilukako. 16 Vuno honi omu mucilimo, vakashunguiya cifuti cacili, cikeco cije ca muilu. Nankuma Njambi kevu shuamua mukumutumbula nguavo Njambi yavo, muomu navavuahesela laja nganda.

17 Kuhitila mu lutsilielo Avilahama, omo vamuesekele, ualambuile Isake ngue nkombelo, kaha ikeye uatambuile cikulaheso kaha ualivuaheselele kuhana nkombelo munendi uje umo lika, 18 hali ikeye uahandekele nguendi, "Kuhitila muli Isake vatekuluila vove vakavaluka." 19 Avilahama uazivukile nguendi Njambi asa kusangula vantu cipue ku vatsi, kuhandeka muavusunga, uamutambuile naua.

20 Kuhitila mu lutsilielo Isake uahanene vikuisulo via kulutue kuli Yakomba na Isau.

21 Kuhitila mu lutsilielo Yakomba omo uatsile, uakuisuile vana va Yosefa umo na umo, uakotamenene ha mutue ua mbueti yendi mukulemesa.

22 Kuhitila mu lutsilielo Yosefa omo uakele kuyehi na kutsa, uahandekele ha vungenzi vua Vaisaleli nakuvaleka mu ngila ivanapande ku mutsindilamo.

23 Kuhitila mu lutsilielo Mosesa, omo uasemukile vamushuekele ha vingonde vitatu kuli visemi vendi, muomu vamuene nguavo muanike uacili, kaha kuvakele na liova nevi viahandekele muene.

24 Kuhitila mu lutsilielo Mosesa omo uakolele, uavianene kumutumbula nguavo vaina muna Falao, 25 uahanguile kulipangela tuyando na vantu va Njambi kupulakana kulinga viuma vituala ku vupi. 26 Uacimuene nguendi kasauntu ka kuyanda muomu ya Kilistu cinapu vufuko vuakama kupulakana vufuko vua mu Ingito, muomu uavandamenene kutambula vuana kulutue.

27 Kuhitila mu lutsilielo Mosesa uasezele Ingito, kateuele vukalu vua muene, muomu uakolesele ngue namono Njambi uje kutuekumona. 28 Kuhitila mu lutsilielo Mosesa uaniungile Paseka na kushamuina maninga, linga Muka kupihisa vana va vamala va vantuatua keti akuate vana Vaisaleli.

29 Kuhitila mu lutsilielo vantu vajavukile ndonga ya kuvenga ngue ha mavu akuma, vuno honi vaka Ingito, omo vesekele kulinga muje, kaha voshe vanongele. 30 Kuhitila mu lutsilielo vivumbe via Yeliko viauile ha mavu hanima ya kuvizenguluka vantu va Isaleli ha matangua atanu na avali. 31 Kuhitila mu lutsilielo Lahave uje cikuizi katsile navaje kuvononokele, muomu ualingile vusamba vuakutambula vaje vaka kunenga cije cifuti.

32 Nkuma njikahandeka vati honi? Kunjesi na ntsimbu ya kuleka Ngilioni, na Mbalake, na Samusoni, na Njefeta, na Ndaviti na Samuele na tunanguizi, 33 vaje kuhitila mu lutsilielo vahianene vimiene, valingile via vusunga, vatambuile vikulaheso, vashokele tunua tua vandumba, 34 vazimine tuhia tua vukalu, vaputumukile kukuvatapa ku mukuale, vakele na nzili kuhuma kukuzeya, vapuile vaka nzili yakama mu nzita, vahianene masualale va vangenzi kaha vateuele. 35 Vampuevo vatambuile vaka kutsa muvasangukile.

Vamo vavayandesele cikuma, na kuviana kutambula kuzituka, linga vahinduke naua ku muono uacili. 36 Vamo vayandele na ku vashendumuna na kuvapupa, kaha na kuvakuta na malienge na kuvahaka mu kamenga. 37 Vavashele mavue, vavatetangele hakati, kaha vavatsihile na mukuale, vendanganene mu vilambu via vampanga na vampembe, na kuhutuua, nakuvapangesa mua mupi, 38 kuli vakevo mavu kakele naseho vendanganene mu vimpambo na ha minkinda, na mu vipuku na mu vina via kucokola mu mavue aha mavu.

39 Kaha vioshe evi, cipue vene va vavesekele na lutsilielo luavo, vuno honi kuvatambuile vije viva vakulahesele, 40 muomu honi Njambi uamuene cuma cacili hali yetu, kaha kuvanga hamolika netu ambahoni navakevo vakavapuisa va vusunga.