1 Honi cuma eci tuli nakuhandeka cinapu ngacije, tuli nauje Kasasendote Uakama, uje natumama ku livoko liacilo ku litanda lia Muene ua Nzili yoshe ua muilu, 2 muka kupanga mu cihela cakulela cikuma na mu mbalaka ya vusunga ije vatungile keti ku muntu vuno honi kuli Muene.

3 Muomu uoshe kasasendote uakama vamuhangula linga ahane mavuana na vinkombelo, kaha capandemo kuli kasasendote naua kukala na cimo linga alinge nkombelo. 4 Honi nga uakele ha mavu, ngue kapuileho kasasendote, muomu kuakala vasasendote vaje vakakuhana mavuana kusetekesa na lishiko. 5 Vakapangela cifua na cimbembe ca cihela ca muilu cakulela, muomu Mosesa uatondele kutunga mbalaka ije ya mushikile Njambi nguendi, "Tala, ngeci ulinge vioshe kuya naseteko ije ivakumuesele ha munkinda." 6 Vuno honi kuya nomu cilimo, Kilistu natambula cipangi cakama cikuma kupulakana ca laja ngue litavasano lije lianemanena linapu liacili, muomu litavasano eli linemanena vikulaheso viacili.

7 Muomu nga litavasano lia kulivanga kuliakele na mulonga, ngue kukuakele naua litavasano lia mu civali. 8 Muomu Njambi nauana mulonga hali vakevo kaha akahandeka nguendi,

"Matangua akeja, muanahandeka Muene,

omo njikapanga litavasano lialiha na njivo ya Isaleli na njivo ya Yunda.

9 Keti ngue litavasano lije njalingile na vaishavo

ha litangua linjavambatele na livoko mukuvatuamenena omo

vahumine mu cifuti ca Ingito,

muomu kuvatualeleleho mu litavasano liange,

kaha kunjovuilile kuli vakevo, muanahandeka Muene.

10 Eli likelio litavasano linjikalinga na njivo ya Isaleli

hanima ya matangua aje, muanahandeka Muene

Njikahaka mashiko ange mu mana avo,

nakuuasoneka mu mitima yavo,

kaha njikapua Njambi yavo,

navo vakapua vantu vange.

11 Kaha ku vakalongesa muntu uoshe

cipue kuhandeka kuli umo na mukuavo nguavo, ‘Zivuka Muene,’

muomu voshe vakanjizivuka, kuhuma ku uamundende kutuala ku uakama.

12 Muomu njikakala na cikeketima ha vupi vuavo,

kaha kunjivuluka naua vipi viavo houe."

13 Hakuhandeka ha litavasano lialiha akalinga lialaja kupua lia kuhona seho. Kaha cije cikapua ca kuhona seho nakukuluvala vuavuno kucikamoneka naua.