1 Nankuma, muomu cikulaheso cije cakukakovela mukuhuima cendi hanga kucili, tuyeni tuliniunge ngeci naumo uahi ueni akahonoue kuhetako. 2 Muomu Muzimbu Uacili uezile kuli yetu ngue muje naua muuezile kuli vakevo, vuno honi muzimbu uje uvovuile ku uavakuasele, muomu ku ua litavasanene na lutsilielo lua vaje vauvuile. 3 Honi yetu vaje tunatsiliela tukakovela mu kuhuima cije, ngue muje nahandeka nguendi,

"Ngue muje njalisingile mu vutenu vuange nguange,

‘Ku vakakovela mukuhuima cange!’"

Cipue vene vipangi viendi viahuile hume haluvula lua mavu. 4 Muomu ikeye umo uje kuvisoneka vimo nahandeka ha litangua lia Sapalalo mu ngila eyi nguendi, "Kaha Njambi uahuimine ha litangua lia Sapalalo ku vipangi viendi vioshe." 5 Kaha naua mu cihela eci uahandekele nguendi, "Kuvakakovela mukuhuima cange." 6 Nankuma hanga kuasala vamo vakakovelamo mukuhuima cije, kaha vaje vatambuile Muzimbu Uacili ha kulivanga vahonouele kukovela mukuhuima cije muomu yakuhona kuononoka cavo, 7 kaha naua Njambi uahanguile litangua likuavo, "Lelo," nguendi kuhitila muli Ndaviti laja kunima, mu mezi muje vanahandeka nguavo,

"Lelo, omo muvua lizi liendi,

keti mukolese mitima yeni."

8 Muomu nga Yoshua uavahanene kuhuima, ngue Njambi kahandekele naua litangua likuavo. 9 Nankuma honi Sapalalo inasala ngoco vene litangua liakuhuima lia vantu va Njambi. 10 Muomu uoshe uje akovela mukuhuima ca Njambi ecela kuvipangi viendi ngue muje mualingile Njambi kuvipangi viendi. 11 Nankuma tuyeni tueseke muoshe mutuaselamo ngeci tukakovele mukuhuima cije, linga naumo uahi akahonoue ngue muje muvalingile vakevo ha kuhona kuononoka cavo.

12 Muomu lizi lia Njambi lili nakuyoya na kupanga, nakuvambuka kupulakana mpoko ya mukuale ya vutuesi kuvali, lituva lihangununo lia muono na cimbembesi, na manunga na vusoso, likasompo viyongola na vilinga via mutima. 13 Kaha kuli ikeye na cimo cahi cakutanga capua cakushueka, vuno honi vioshe viapua via kufukuka kaha viakala hakutoka ku mesho endi, nakuli uje tutonda kuvilinga.

14 Nankuma honi tuli na kasasendote uakama cikuma uje nahiti melu oshe, Yesu, Muna Njambi, tukakateyeni na kulitava cetu. 15 Muomu kutuesi na kasasendote uakama uje kasa kutetela kuzeya cetu, vuno honi tuli na umo uje mu vingila vioshe vamuesekele ngue yetu naua, kuakuhona vupi. 16 Ambahoni tuyeni na kusimpa tushuene ku litanda lia Njambi lia kavumbi, linga tutambule cikeketima na kuuana kavumbi kaje katukuasa ha ntsimbu ije tukajena.