1 Nankuma tunapande kuvuilila cikuma kuli evi tunevu, linga keti tuhume ku viuma evi. 2 Muomu nga muzimbu uvahandekele tungelo uapuile ua vusunga kaha uoshe uje kaukavangeyele nakuhona kuuononoka uatambuile kashitiko kaje kamupande, 3 nkuma tukateua vati nga tuviana kuovoka eci cakama? Vacihandekele kuli Muene ha kulivanga, kaha vatulekeleco kuli vaje vamuvuile, 4 tele Njambi naua ali nakuhana vukaleho vua vimueso na vipupu na vikomoueso viakuliseza seza na mavuana a Cimbembesi Uakulela nahana kuya ku cizango cendi.

5 Muomu keti ku tungelo Njambi uahanene linga vakayule mavu aje alinakuija, evi vikevio vije tuli nakuhandeka. 6 Kuli kumo mu visoneka vanacihandeka nguavo,

"Muntu uapua iya linga yove umusinganieke,

cipue Muna Muntu linga umuhakele mana?

7 Uamupangele muka ntsimbu kakandende lika muintsi lia tungelo,

uamuzikile cilongo ca vumpau na kasingimiko,

8 vahakele viuma vioshe muintsi lia viliato viendi."

Honi hakuhaka viuma vioshe linga avisuane, kasezeleko na cimo cije kasuanene. Ha ntsimbu ino ni, kanda tumone vioshe kupua muntsi liendi. 9 Vuno honi tuamono Yesu, uje muka ntsimbu kakandende vamulingile kukala muintsi lia tungelo, na kumuzika cilongo ca vumpau na kasingimiko muomu ya tuyando tua kutsa, ngeci ha kavumbi ka Njambi atsile vantu voshe.

10 Muomu camupandele ngeci Njambi, kuhitila muli ikeye na hali ikeye viuma vioshe vikaleko, mukuneha vana vavengi ku vumpau, muomu kuhitila mu kuyanda cendi akava tuamenena ku kuovoka ca vusunga. 11 Muomu ikeye muka kulelesa kaha na vaje vavalelesa voshe vanapu vaka ntanga imo lika. Muomu yeci mukemo kevu shuamua muku vatumbula nguendi vamuanetu, 12 nahandeka naua nguendi,

"Njikahandeka lizina liove kuli vamuanetu,

mukati ka cikungulukilo njikakushangazala."

13 Kaha naua nguendi,

"Njikahaka kutsiliela cange muli ikeye."

Kaha naua nguendi,

"Yange uno, hamo na vana vaje Njambi nanjihana."

14 Nankuma, muomu vana vaje valipangela muvila na maninga, na ikeye vavenia naua uambateleko cifua cimo ca vuntu, ngeci kuhitila mukutsa cendi linga anongese uje ali na nzili ya kutsa, ikeye uje Liyavolo, 15 nakupatula voshe vaje vakele na liova lia kutsa na kuyoya vuyoye vua vundungo. 16 Cilivene keti tungelo nahakela mana vuno honi vatekuluila va Avilahama. 17 Nankuma vamupangele mucifua cimo lika na vamunaina mu cifua coshe ngeci apue ua cikeketima na kasasendote uakama ua kulongua mu cipangi ca Njambi, nakupua nkombelo ya fueto yakukonekela vipi via vantu. 18 Muomu ikeye vavenia uayandele na kumueseka, kaha asa kukuasa vaje vali mu vieseko.