1 Nankuma, muomu civunga cakama ca vakaleho cina tuzenguluka, kaha netu naua tusezeni cuma coshe cakulema, na vupi vuje vuatukakateya, kaha tuyeni tushatuke nakukakateya seteko ije vanatuhakela kulutue, 2 oku tutala kuli Yesu ikeye uje muka kututuamenena na kulingisa lutsilielo luetu vusunga, uje omo yanzolela ije ivamuhanene kaha uasimpile ha cilindakano, kovuile shuamua, kaha natumama ku livoko liacilo ku litanda lia Njambi.

3 Singaniekeni hali ikeye uje uasimpile kuli vaka vupi mu vamuyandeselelemo, linga keti muzeye cipue kuhona. 4 Mu tuyando tueni hakuluisa vupi kanda mucihete ha ntsimbu yakumuania maninga eni. 5 Kaha nkuma uasuvu eli lizi lia kukolesa lije livakamisana ngue Njambi akahandeka na munendi ndi? Lije lihandeka ngualio,

"Munange, keti usembulule ha kukulongesa mana kuli Muene,

kaha keti uzeye omo akuhana kashitiko.

6 Muomu Muene akalongesa mana kuli uje yazanga,

kaha akahana kashitiko kuli muana uoshe uje yakatambula."

7 Cinapu muomu ya kumilongesa mana ngeci muli nakuyanda. Njambi ali na kumilongesa mana ngue vana vendi, muomu nkuma kuli muana uje ishe kekulongesa mana ndi? 8 Kaha nga vamiecela cakuhona kumilongesa mana ngue muje muvakalingi voshe, kaha munapu vana vamu vupangala keti vana va vusunga. 9 Kumutambela ukuavo, tuakele na vatatetu vaha mavu vaje vasele kutulongesa mana kaha tuavasingimikile. Kaha nkuma kutuapandele kukundama cikuma kuli Tatetu ua vimbembesi na kuyoya ndi? 10 Muomu vatulongesele mana mu kantsimbu kakandende mukuvuahelesa vakevo vavenia, vuno honi ikeye atulongesa linga tuuane viacili, ngeci tulipangele kulela cendi hamo. 11 Muomu ha ntsimbu yaindende vilongesa via mana vivuisa kuvavala kupulakana kuvua vuino, vuno honi hanima yevi vikanehe vushuka vua ciyulo vua vusunga kuli vaje vavanalongesa ku vikevio.

12 Nankuma junduleni mavoko eni akuua akuhona nzili kaha koleseni mavuli eni akuzeya, 13 kaha sungameseni vingila omo ya viliato vieni, linga uoshe cilema keti va muhangunune kuva kuavo vuno honi linga akanguke.

14 Lingeni muoshe muje muamuaselamo kulinga ciyulo na vantu voshe, kuakuhona kulela kaha naumo uahi akamona Muene. 15 Taleni ngeci naumo uahi napande kuhonoua kutambula kavumbi ka Njambi, "linga keti kukale muzi ua kushasha" ukasoke nakuneha vukalu, kaha omo yavio vavengi vakapua vakujuala, 16 ngeci naumo uahi alinge vupangala cipue kukala na mutima uakuhona vu Kilistu ngue Isau, uje ualandesele kapandi kendi ka vukuluntu ha cakulia cimo. 17 Muomu muazivuka ngueni hanima yevi, omo uatondele kusuana vikuisulo, vuno honi vamuvianene, muomu kauanene ntsimbu ya kutenguluka ku vipi viendi cipue vene ualilile.

18 Muomu kumuezile ku munkinda uje umunapande kukuata, uje uakushukuma na tuhia, na milima, naku lishuashuata, na mpunzi yakama cikuma, 19 na cililimo ca tolombita, na lizi lia mezi aje alingisile vaka kuivuilila nguavo keti vevue muzimbu ukuavo naua uje uvakahandeka kuli vakevo. 20 Muomu kuvasimpile nakushika cije civavahanene, "Cipue vene cikashama nga akakuata ha munkinda, vaka mutsiha na mavue." 21 Cilivene, cije camuene Mosesa cateuesele cikuma kaha uahandekele nguendi, "Njili nakujaja naliova."

22 Vuno honi muneja ku Munkinda ua Siyone na ku nganda ya Njambi ua kuyoya, Yelusalema ya muilu, na tungelo vavengi cikuma vanakunguluka hamo, 23 kaha ku cikungulukilo ca muana ua ntuatua vaje mazina avo vana asoneka muilu, na kuli Njambi uje muka kusompa ua viuma vioshe, na vimbembesi via vantu va vusunga vanavipuisa kupua vusunga, 24 kaha kuli Yesu, uje muka kuimanena litavasano lialiha, kaha naku maninga aje akushamuina aje akahandeka cikuma via kavumbi kupulakana maninga a Avele.

25 Taleni ngeci keti mumuviane uje ali nakuhandeka. Muomu nga kuvateuele omo vamuvianene uje ua vananguile hano ha mavu, kaha yetu tukateua vati nga tuviana uje akatunangula ua muilu. 26 Ambahoni lizi liendi lianingangesele mavu, vuno honi na kulahesa nguendi, "Kunjika ningangesaho mavu lika vuno honi na melu." 27 Lizi eli "Naua," limanena kuhumisa vije vininganga linga honi vije viakuhona kuninganga visaleho. 28 Nankuma tuyeni tutsantsele ha kutambula vumuene vuje kuvue kuninganga, kaha honi tuyeni tulambuile kuli Njambi kulemesa cije casa kutambula na kasingimiko na liova, 29 muomu Njambi yetu uapua tuhia tuakunongesa.