1 Hali ou Melekizendeki, muene uaku Saleme, kasasendote ua Njambi ua Nzili Yoshe, ualiuanene na Avilahama ahiluka kuhuma ku nzita kuje kua katsihile vimiene kaha uamukuisuile, 2 kaha Avilahama uamuhanene ca vulikumi ku viuma vioshe. Ha kulivanga ualumbunuine lizina liendi nguendi "Muene ua Vusunga," ambahoni naua nguendi "Muene uaku Saleme," kulumbununa "Muene ua Ciyulo." 3 Melekizendeki kakele na ishe cipue vaina cipue vakukuluila vendi, kakele na maputukilo a matangua cipue mamanusuilo a muono, vuno honi ualifua ngue Muna Njambi alina kutualelelaho kupua kasasendote ua yaye.

4 Taleni vukama vuendi havuapua! Avilahama mukakutuluila uamuhanene ca vulikumi ku viuma vioshe vije viambatele ku nzita. 5 Kaha nakuli vaje vatekuluila va Levi vaje vakatambula cihela ca vusasendote vaje vavashikile mu lishiko kuambata ca vulikumi ku vantu, eci kulumbununa kuhuminina kuli vamunaina, cipue vene navakevo vapua vatekuluila va Avilahama. 6 Vuno honi Melekizendeki kakele ku ntanga yavo uatambuile ca vulikumi kuli Avilahama nakumukuisula kuli uje uakele na vikulaheso. 7 Kucesi na vimpata ngeci uje uamundende vamukuisuile kuli uje uakama. 8 Mu ngila imo ca vulikumi vacitambula ku vantu vaje vatsa, kaha mu ngila ikuavo naua vacitambula kuli uje ivatumbula nguavo uayoya. 9 Umo asa kuhandeka vene nguendi Levi ikeye vavenia, uje ikeye muka kutambula ca vulikumi, uafuetele ca vulikumi kuhitila muli Avilahama, 10 muomu Melekizendeki ualiuanene na Avilahama, tele Levi kanda asemuke.

11 Honi nga vucili va vuuanene kuhitila mufutisi ya Valevi (muomu ya futisi eyi mukemo vantu vatambuile lishiko), nkuma vika naua vatondelele mukuavo kasasendote linga akaleko hanima ya kuyula ca Melekizendeki, nkuma keti uje ivatumbuile hanima ya kuyula ca Alone? 12 Omo nga kuli kutengulula mu futisi ya vusasendote, kaha cacili kutengulula lishiko naua. 13 Muomu evi viuma vavihandekele kuli muntu uje uakundama ku muyati ueka, muomu naumo uahi uapangelaho laja ku mutula. 14 Kuya na vukaleho, Muene uetu uahumine ku muyati ua Yunda, kaha mukulipandakana na muyati uje Mosesa kahandekeleho cimo hali vasasendote.

15 Eci cipua honi na vukaleho vuakama muomu kasasendote ueka akeja mucifua ngue ca Melekizendeki, 16 uje napu kasasendote, keti ngue na mashiko cipue vutumbe vua vantu, vuno honi na nzili ya muono ua yaye. 17 Muomu vanahana vukaleho hali ikeye nguavo, "Unapu kasasendote ua yaye, ngue muje muapuile Melekizendeki." 18 Ku mutambela ukuavo, lishiko lia laja vanalihaka kumukulo muomu liapuile lia kuzeya nakuhona seho. 19 (muomu lishiko kuliapangele viacili), ku mutambela ukuavo, kutsiliela cacili va nacinehe, kaha naua cinatuneha kuyehi na Njambi.

20 Kaha eci kucakele nakulingiua kuakuhona cisingo. 21 Vaje vasasendote valaja valingile vipangi viavo kuakuhona cisingo, vuno honi ou vamulingile na cisingo nguavo,

"Muene na lisingi

kaha kakatengulula mana endi,

‘Ukapua kasasendote uayaye.’"

22 Eci cilingisa Yesu kupua ua vusunga vua litavasano liacili.

23 Vaje vasasendote va laja vapuile vavengi cikuma, muomu vavahonouesele ku kutsa linga vatualeleho mu cipangi cavo, 24 vuno honi ikeye nakuatelela vusasendote vuendi vuayaye, muomu ali nakutualelelaho. 25 Kaha ha ntsimbu yoshe asa kuovola vaje vashuena kuli Njambi kuhitila muli ikeye, muomu ikeye uayoya ntsimbu yoshe linga avalombelele.

26 Muomu capande linga tukale na kasasendote uakama, uakulela, uakuhona mulonga, uakuhona vupi, uakulitepa ku vaka vupi, vamujunduile helu lia melu. 27 Kalingile ngue vaje vasasendote vakama, vakele nakuhana nkombelo ha litangua na litangua, cakulivanga ha vipi vuendi vavenia ambahoni via vaje vantu, ualingile eci lumo kunahu omo ualihanene ngue nkombelo ikeye vavenia. 28 Cilivene, lishiko likahangula vantu kuya kukuzeya cavo kupua vasasendote vakama, vuno honi lizi lia cisingo, lije liezile hanima tele lishiko kanda likaleko, likahangula Muana uje vapuisa uakulela ntsimbu yoshe.