1 Mu vuingi na mu vingila viakuliseza seza Njambi uahandekele vialaja kuli vatatetu kuhitila muli tunanguizi, 2 vuno honi mu matangua ano amamanusuilo nahandeka kuli yetu kuhitila muli Munendi, uje yahanguile kuyula viuma vioshe, kuhitila muli ikeye naua uatangele mavu. 3 Alinakumuesa vumpau vua Njambi na ikeye vene kaha nambata cifua ca Njambi, nakukuata lilu na lizi liendi lia nzili. Hanima yakukusha vipi, kaha uatumamene ku livoko lia cilio lia Mukanzili yoshe.

4 Hakupuako uakama mukuhiana ku tungelo ngue ku lizina liatambuile liapuile liakama cikuma kupulakana avo.

5 Nkuma ku kangelo muka kuje Njambi uahandekele nguendi,

"Yove unapu Munange,

lelo njinapu yange Isho?" Cipue naua,

"Njikapua nji Ishe,

kaha akapua Munange?"

6 Kaha naua, omo aneha muana ua ntuatua hano ha mavu, kaha ahandeka nguendi,

"Eceleni voshe tungelo va Njambi vamulemese."

7 Ku tungelo ahandeka nguendi,

"Iya muka kulinga tungelo vendi kuvapuisa mpunzi,

kaha na vangamba vendi kuvapuisa milengi ya tuhia."

8 Vuno honi kuli Muana ahandeka nguendi,

"Litanda liove, yove Njambi liapua lia yaye!

Mbueti ya vusunga ya muene yapua mbueti ya vumuene vuendi.

9 Kaha uazanga vusunga nakuzinda vupi,

nankuma Njambi, Njambi yove nakuvuavesa

na mazi akujolela kupulakana vakueni."

10 Kaha uahandekele naua nguendi,

"Yove Muene, hambangelo uatangele mavu,

na melu apua vipangi via mavoko ove.

11 Vikanonga, vuno honi yove ukasala,

vioshe vikakuluvala ngue vuzalo vua laja.

12 Ukavaheteka ngue kazaku,

kaha vakalumuka.

Vuno honi yove ukapua muje vene,

kaha na miaka yove kuikahu."

13 Nkuma ku kangelo muka kuje uahandekele nguendi,

"Tumama ku livoko liange lia cilio

noho njikalinga vitozi vove

cituamo ca viliato viove?"

14 Nkuma keti tungelo voshe vaje va vipangi via vimbembesi vakevo vavakatumu kupanga, muomu ya mulonga ua vaje vakatambula kuovoka ndi?