1 Yange Paulu cinzinda ua Kilistu Yesu, njili na Timateo muanetu.

Tulina kusonekela kuli Filimoni ua cizango mukuetu mu vipangi, 2 na kuli Afiya muanetu uampuevo na kuli mukuetu lisualale Alikipase, naku cikungulukilo cije cili mu njivo yove.

3 Njambi Tatetu na Muene Yesu Kilistu vamihane kavumbi na ciyulo.

4 Njikatsantsela kuli Njambi yange ntsimbu yoshe omo njikavuluka mu malombelo ange, 5 muomu njivua cizango cove na lutsilielo luje ulinaluo hali Muene Yesu na ku vantu vakulela voshe va Njambi, 6 kaha njilomba nguange kulipangela ca lulitsilielo luove case kutualalutue mana aviacili vioshe vije vinapu vietu muli Kilistu. 7 Muomu njinauana nzolela yakama cikuma na kuzembeleka ku cizango cove, muanetu muomu mitima ya vantu vakulela va Njambi vanavuahelela muacili kuhitila muli yove.

8 Kuya mucinailamo, cipue vene nguavo njasimpi cikuma muli Kilistu mu kukushika linga upange vije vitondeka, 9 vuno honi muomu ya cizango njilina kulomba kuli yove, yange Paulu yala ua mukuluntu kaha honi naua cinzinda ua Kilistu Yesu. 10 Njilina kulomba kuli yove omo ya munange Onesimasi, uje napu munange oku tele njicili mu kamenga. 11 Ha ntsimbu yakunima uapuile uakuhona seho kuli yove, vuno hano honi alinaseho kuli yove nange.

12 Njilina kumutuma linga ahiluke kuli yove, ikeye mutima uange uoshe. 13 Ngue njinavuahelela kukala nendi hamo nange, linga ase kunjipangela cipangi cije ciunapandele kupanga yove oku njicili mu kamenga muomu ya Muzimbu Uacili. 14 Vuno honi kunjitondo kulinga cimo kuakuhona yove kunjitavesa, linga honi vucili vuove keti vupue ngue vuakukuzangesa vuno honi vua kucizango cove vavenia.

15 Mpamo eci cikeco canehesele ngeci Onesimasi ahangunuke kuli yove muka ntsimbu lika, linga ukakale nove naua ntsimbu yoshe, 16 keti honi ikeye ndungo vuno honi napulakana ndungo, ikeye muanetu ua cizango, nga kuli yange cinafu muje, kaha kuli yove cikafua vati honi, muoshe mu vuntu na muli Muene.

17 Nankuma nga unjitanda nguove njimukueni muka kupanga, kaha mutambule ngue muje munapande kutambuilamo yange. 18 Nga amipihisila cipue kumikonguela cuma coshe, yange njikamifuetavio. 19 Yange Paulu njisoneka evi na livoko liange, njikavifueta. Kuakuhona kuhandeka cimo ku vije viuakonguele kuli yange. 20 Eyo, Muanetu, njitonda linga unjilingileko eci muli Muene. Vuahelesa mutima uange muli Kilistu.

21 Kusimpa ca kuononoka cove, njilina kukusonekela evi omo njazivuka nguange ukalinga viakama cikuma kupulakana evi njilinakuhandeka. 22 Ha ntsimbu imo lika vene, njivuaheseleni mu njivo ya vangenzi, omo njatsiliela nguange kuhitila mu malombelo eni nange naua hamo njikahiluka kuli yeni.

23 Epafalase, mukuetu cinzinda muli Kilistu Yesu, natumu vihindu kuli yeni,

24 Kaha na Mako vene, na Alisitakase, na Ndemase, na Luka, vakuetu mu vipangi na vakevo vanatumu vihindu.

25 Kavumbi ka Muene Yesu Kilistu kakale na cimbembesi ceni.