1 Vulukisa vantu vove vapue vakakulihana ku vaka kuyula na ku vaka nzili yakama linga vavononoke, naku livuahesela mukulinga muacili muviuma vioshe. 2 Valeke keti vashaule muntu uoshe, vuno honi vapue vaka ciyulo na kulizanga, kaha ntsimbu yoshe vamuese vucili vunapandemo ku mesho a vantu voshe. 3 Yetu naua tuapuile tuvilema, vakakuhona kuononoka, navakakupihisa. Tuapuile vandungo vamashungu na senga yakuliseza seza. Tuahakele vuyoye vuetu kulizangamena, na cipululu, vakuetu vatuzindile kaha netu tuavazindile. 4 Vuno honi omo ya ngozi na cizango ca Njambi Muyoyesi uetu viasholokele, 5 ikeye uatuovuele. Keti ngue ku vilinga vietu vavenia viakusungama vitualingile houe, vuno honi muomu ya cikeketima cendi vavenia ngeci tunovoka, kuhitila mu Cimbembesi Uakulela uje uatukushile linga tupue tuvavaha nakuuana muono uauha. 6 Njambi uetilile Cimbembesi Uakulela hali yetu muvuingi kuhitila muli Yesu Kilistu Muyoyesi uetu, 7 linga ha kavumbi kendi vatupuise vaka vusunga ku mesho a Njambi nakutuhana muono ua yaye uje tunatsiliela. 8 Eci cinapu kuhandeka ca vusunga.

Njitonda uhandeke cikuma viuma evi, linga voshe vaje vaka kutsiliela kuli Njambi vakahane ntsimbu yavo mukulinga vipangi viacili, vije vinapu viacili, kaha vikuasa muntu uoshe. 9 Vuno honi yove teua ku vimpata via vulema, na via mikana ya mazina a vakukuluila na kucokota na kulizunga ha Lishiko. Evi vinapu viangoco, kuviesi na seho. 10 Nangula luvali ku vantu vaje vaneha kahangu, kaha honi keti ulinge naua cuma ceka navo. 11 Unazivuka ngeci muntu uacifua cangacije uapua ua mana a mapi, kaha vipi viendi vilina kumusholola ngeci napihisa.

12 Omo njikatuma Aletemase cipue Taikikase kuli yove, kaha unapande kuija kuno kuli yange ku Nikapolise, muomu njayongola kukala kuje cisika coshe. 13 Unapande kulinga muoshe muuaselamo kukuasa Zenase muka mashiko na Apolo kuvuahesa via vungenzi vuavo, kaha naua tala muacili linga vakale na vioshe via ha vungenzi vuavo vije vatonda. 14 Vantu vetu vanapande kulilongesa kukala na ntsimbu yakulinga vipangi viacili, linga keti vahone cuma cimo, kaha kuvapandele kuyoya vuyoye vuangoco.

15 Voshe vaje njili navo kuno vanatumu vihindu kuli yove. Hana vihindu vietu kuli vavusamba vetu voshe mulutsilielo.

Kavumbi ka Njambi kakale neni voshe.