1 Vuno honi yove unapande kulongesa vije vilitavasana na vilongesa via vusunga. 2 Longesa vakuluntu va vamala linga vapue vakulongua, vakakunanguka, vaka kulihilula vakevo vavenia, vaka lutsilielo, vaka cizango, vaka lukakateya. 3 Mungila imo vene longesa vakuluntu va vampuevo linga vakale ngue vampuevo vaje vayoya mu vuyoye vua kulela. Kuvapandele kupua vakalufue cipue vapue vandungo va viniu. Vanapande kulongesa vije viacili, 4 linga valongese vambanda kuzanga vamala vavo, navana vavo, 5 vapue vakakulihilula vakevo vavenia, na kulela, nakumpua vampuevo vacili vakakuniunga vinjivo viavo, vaje valihana ku vamala vavo, linga naumo uahi ashaule lizi lia Njambi.

6 Mungila imo vene naua, nanguleni na vakuenje linga valiniunge vakevo vavenia. 7 Mu viuma vioshe yove vavenia unapande kupua cimueso mu vipangi viacili. Pua uaku likonkomeka na kuhakela mana ku vilongesa viove. 8 Pangesa mezi akusungama aje kuvasa kuyengula, linga vitozi vove vakale na shuamua, kaha vahonoue kuhandeka via vipi hali yetu.

9 Vandungo vanapande kulihana ku vamiene vavo mu viuma vioshe nakuvavuahelesa. Kuvapandele kulinga navo vimpata, 10 cipue keti vavevile. Vuno honi vanapande kumuesa ngeci ntsimbu yoshe vakevo vapua vacili nakulongua, linga vamuese likongo ku vilongesa via Njambi Muyoyesi uetu mu viuma vioshe vije valinakulinga.

11 Muomu Njambi nasholola kavumbi kendi ka kuovola vantu voshe. 12 Kavumbi aka kalina kutulongesa kuviana yoyesi ya kuhona kulemesa Njambi na mashungu amapi aha mavu, nakuyoya yoyesi yakulemesa Njambi hano ha mavu mukuliniunga mukusungama, 13 ngue omo tuli nakuvandamena Litangua lia kukuisula lije litunatsiliela, omo vumpau vua Njambi yetu uakama na Muyoyesi uetu Yesu Kilistu vukasholoka. 14 Ualihanene ikeye vavenia hali yetu, mukutuohiela ku vipi vioshe, nakutupuisa vantu vakulela vaje vakundama kuli ikeye lika, vaje vali na cizango cakulinga viacili.

15 Longesa viuma evi, kaha pangesa nzili yove yakama omo ukolesa nakuvindika vaje vaka kukuvuilila. Keti utave umo uavo akusembulule.