1 Yange Paulu ngamba ya Njambi na kanganda ua Yesu Kilistu.

Vanjihanguile nakunjituma mukukolesa lutsilielo lua vantu vaje vanahangula Njambi naku vatuamenena ku vusunga vua mana vuje vuvalongesele kufutisi yetu yakulemesa Njambi, 2 vusunga vuje vunemana hakutsiliela ca muono uje uayaye. Njambi uje kekukuisa, uatukulahesele muono ou ntsimbu tele kanda vatange mavu, 3 uasholuele lizi liendi kuli yange ha ntsimbu yendi ya cili. Eci vanjikundikileco yange linga njicambulule hakushika ca Njambi Muyoyesi uetu.

4 Njilina kusonekela Tito, munange ua vusunga mulutsilielo luje tulinaluo yetu voshe.

Njambi Tatetu na Kilistu Yesu Muyoyesi uetu vakuhane kavumbi na ciyulo.

5 Evi vikevio njakusezelele mu Kelete linga uvuahese viuma viasaleleko, nakuhangula vakuluntu va vikungulukilo ku nganda na nganda, ngue muje njakulongesele. 6 Mukuluntu ua cikungulukilo napande kupua uakuhona mulonga, napande kupua yala ua mpuevo umo lika, kaha vana vendi vanapande kupua vaka kutsiliela, keti vipapoke cipue vakakuhona kuononoka houe. 7 Muomu ntuama ua cikungulukilo uapua kaniungi ka vipangi via Njambi, napande kupua uahona mulonga. Kapandele kupua muka kulihalesa cipue muka kuniengua vuasi, cipue muka kupenda, cipue muka luozi, cipue muka lizangamena lia vimbongo. 8 Vuno honi apue mukakujumbula vangenzi na cizango cije cacili. Napande kupua mukakulihilula ikeye vavenia, uakusungama, uakulela, namu kakalemeso. 9 Napande kupua mukalukakatela mu vilongesa via lutsilielo, vije vivasa kutsiliela. Mu ngila eyi vene asa kukolesa vakuavo na vilongesa via vusunga, nakusholola naua milonga ya vaje vaka kuluisa lizi.

10 Muomu kuvali vavengi vaka kutengulukila na vakakuluisa vakuavo na viuma viavo viangoco cikuma, vaje vakafutisi ya Vayunda. 11 Cafuila kuvindika vihandeka viavo, muomu vakevo vakanienguesa ntanga yoshe mukuvalongesa vije kuvapandele kulinga muafua ya vilinga via shuamua, linga vauane vimbongo. 12 Kaha umo uavo, umo ua tunanguizi tuavo, uje uahandekele vusunga mukuhandeka nguendi, "Vaka Kelete ntsimbu yoshe vapua vakamakuli, vapua vikashama va vapi, vilenda vakulakama." 13 Vije viahandekele viapuile via vusunga. Nankuma, vahandekele na mezi akuvambuka ngue mpoko, linga vakale nalutsilielo luamutuntu, 14 linga keti vovuilile ku visimo via Vayunda na ku mashiko akuhuma ku vantu vaje vanaviana vusunga. 15 Viuma vioshe vinalele kuli vaje vanalele, vuno honi kukuesi cuma cakulela kuli vaje va nalijualesa, na kuli vaje vakuhona kutsiliela, muomu mana na vilinga viavo vinapu via kujuala. 16 Vahandeka nguavo vazivuka Njambi, vuno honi vilinga viavo kuva vikavangeya. Vapua vaka kuzinda na kuhona kuononoka, kaha kuvapandele kulinga viuma viacili.