1 Njikushika ha mesho a Njambi na Kilistu Yesu vaje vakasompo vaka kuyoya na vaka kutsa, kaha mukusholoka cendi na vumuene vuendi, 2 ambulula lizi, livuahesele vualumo mu vintsimbu viacili cipue via vipi, sungamesa, tenukila, kolesa, longesa na lukakateya, keti uhonoue mukusimpa namu kulongesa. 3 Muomu ntsimbu ilinakuija omo vantu kuvakahakela mana ku vilongesa via vusunga vuno honi vaka kavangeya mashungu avo, kaha vaka litondela vakevo vavenia valongisi vavengi vaje vakavaleka vije viatonda matuitui avo kuivua. 4 Kaha vakalikela kuvuilila ku vusunga nakuputuka kuvuilila visimo via makuli. 5 Vuno honi yove ntsimbu yoshe livuahesele vualumo, kolesa mu tuyando, linga vipangi viakuambulula Muzimbu Uacili, shulisisa vipangi viove.

6 Muomu yange njalivuahesela vualumo kunjilinga nkombelo, ntsimbu yange yakukatuka inahete. 7 Njinalu nzita yacili, njinashatuka nakumanusula seteko yange, njinaniungu lutsilielo luange. 8 Honi kuli cilongo ca vusunga civananjitulikila, cije Muene ikeye muka kusompa ua vusunga akanjihanaco ha Litangua lije, kaha keti yange lika vuno honi na vaje voshe vazangele kuija cendi.

9 Linga muoshe muuasela linga uije kuli yange vuavuno. 10 Muomu Ndemase nazange mavu aua aliko, nanjiseze nakuya ku Tesalonika, na Kelesenese nayi ku Ngalatiya, na Tito nayi ku Ndalematiya. 11 Kuvanga lika Luka likaliendi ikeye ali nange kuno. Ija hamo na Mako, ngeci akunjikuaseko vipangi kuno. 12 Njatumu Taikikase ku Efeso. 13 Omo uija, ija na kazaku kaje kanjasezele kuli Kapasi ku Tolouase, na mavulu, kaha cikuma kumani mikanda yange ije yakuzenga ya vilambu.

14 Elekizanda uje muka kufula nanjilingi muamupi cikuma, Muene akamuhana fueto kuya ku vipangi viendi. 15 Litenge kuli ikeye, muomu ualuisile muzimbu uetu na nzili.

16 Ha kuliluila cange cakulivanga, naumo uahi uanjikuasele, voshe vanjisezele. Keti vavahisileco! 17 Vuno honi Muene uakele nange nakunjikolesa mukuambulula muzimbu mukushula, linga na vaje voshe keti Vayunda vauvue. Kaha uanjovuele naku kutsa. 18 Muene akanjovola ku via vipi vioshe nakunjohiela muomu ya vumuene vuendi vua muilu. Kuli ikeye kukale vumpau ku miaka yoshe ya yaye. Ameni.

19 Hana vihindu kuli Pulisila na Akuila nakuli vaka ntanga ya Onesifolase. 20 Elasitase uasalele ku Kolinte, kaha njasezele Tolofimase ku Miletase oku avavala. 21 Linga muoshe muje muuaselamo ngeci uije ntsimbu kanda cisika cihete. Eumbulase nakumeneka hamo na Pundenisi na Linase na Kalaundiya na vaka kutsiliela voshe vanakumeneka. 22 Muene akale na cimbembesi cove. Kavumbi kakale nove.