1 Vuno honi ivuisisa eci, mu matangua akumanusuilo kukakala vintsimbu viakukaluua. 2 Muomu vantu vakapua vaka kulizanga vakevo vavenia, vakazanga vimbongo, vakalihalesa, vaka lijundula, vakapua vaka kasauntu, vakahona kuononoka visemi viavo, vakahona kutsantsela, vaka kuhona kulela, 3 vaka keniuka, vakahona cikeketima, vakapua vakaleho va makuli, vakapua vaka cipululu, vakahona kulihilula, vakazinda viacili, 4 vaka lu uangania, vaka lupozoka, vaka shula nakulihalesa, vaka zanga senga kupulakana kuzanga Njambi, 5 vaka kakateya viuma via vunjambi vuno honi vakaviana nzili yavio. Litengeni ku vantu ava. 6 Muomu vamo vavo vakalingi vingila viavo viakukovela mu vinjivo via vantu nakukuata vampuevo vaje vakuzeya, vaje vali na viteli via vipi kaha vanashulu na miyati yoshe ya viuma via mazilo, 7 vampuevo vaje vakevuilila ku muntu uoshe vuno honi kuvasa kuheta ha ntsimbu ya kuzivuka mana a vusunga. 8 Ngue Njane na Njambele valuisile Mosesa, mukemo vene na vantu ava valuisa vusunga, vantu va mana a civembulu kaha vaka kuhonoua mu lutsilielo. 9 Vuno honi kuvasa kuya kulutue, muomu vulema vuavo vukasholoka ku vantu voshe, ngue vua vaje vamala vavali va Njane na Njambele.

10 Honi yove Timateo unakavangeya vilongesa viange, nakatumamesi kange, na vutumbe vua vuyoye vuange, na lutsilielo luange, na kusimpa cange, na cizango cange, na lukakateya luange, 11 na mapakeso ange, na tuyando tuange, na viuma vije vialingiuile kuli yange ku Antioke, naku Ikoniyame naku Lisitala, mapakeso akukomouesa aje anjatambuile, vuno honi Muene uanjohielele ku vioshe evi. 12 Cilivene uoshe uje atonda kuyoya vuyoye vua vunjambi muli Kilistu Yesu vaka mupakesa, 13 oku vantu vaka vupi na vaka kukuisa vakatualelelaho kulinga vupi cikuma, kukuisa vakuavo na vakuavo naua vakavakuisa. 14 Vuno honi yove tualelelaho kuli vije unalilongesa kaha kolesa mukutsiliela muomu uazivuka uje ku ualilongeselevio, 15 kuhuma ku vuanike vuove uazivuka vilongesa via kulela vije viasa kukutuamenena ku kuovoka kuhitila mu lutsilielo muli Kilistu Yesu. 16 Visoneka vioshe Njambi uavihuiminine kaha vili naseho mukulongesa, na mukushulisisa, na mukuhilula, na mukuhana vilongesa mu vusunga, 17 linga muntu ua Njambi apue uamutuntu, nakushula mu vipangi vioshe viacili.