1 Ambahoni yove munange, kolesa mu kavumbi kaje kali muli Kilistu Yesu, 2 na vije viunovu kuli yange ha mesho a vakaleho vavengi vaje vakundama ku vantu vakulongua vaje vasa kulongesa naua vakuavo. 3 Lipangele mu tuyando ngue lisualale uakuononoka ua Kilistu Yesu. 4 Naumo uahi lisualale asa kulinga nevi na vije mu vipangi viendi via vusualale, muomu viyongola viendi vinapu kutonda kuvuahelesa uje ntuama yendi. 5 Muka kushatuka kuvasa kumuzika cilongo kuvanga ashatuke muailamo mashiko. 6 Ndimi uakupanga cikuma ikeye napande kukala na mutambela uakulivanga ua vimbuto. 7 Singaniekaho hali evi njihandeka, muomu Muene akakuhana kuvuisisa muli vioshe.

8 Vuluka Yesu Kilistu, vamusanguile ku vatsi, uapuile mutekuluila ua Ndaviti, ngue muvana viambulula mu Muzimbu Uacili uange, 9 uje unjilinakuyandela nakukala mu malienge ngue nji muhuza. Vuno honi lizi lia Njambi likelio kuliesi mu malienge. 10 Nankuma njilina kutualelelaho nalukakateya mu viuma vioshe ha mulonga ua vaje vavanahangula, linga navakevo vakauane kuovoka muli Kilistu Yesu na vumpau vua yaye. 11 Eci kuhandeka capua ca vusunga cije cihandeka nguaco,

"Nga tunatsi nendi,

aha naua tukayoya nendi,

12 Nga tutualelelaho na lukakateya,

kaha naua tukayula nendi,

nga tumuviana,

nendi naua akatuviana.

13 Nga yetu kutuakonkamene,

ikeye hanga uapua uakukonkama,

muomu kasa kuliviana ikeye vavenia."

14 Vavulukise evi, kaha vanangule ku mesho a Muene linga keti vakale na vimpata ha mezi, eci kucesi naseho, vuno honi cipihisa vaje vaka kuvuilila. 15 Linga mu uaselamo kulihana yove vavenia kuli Njambi ngue uje ivanatambula, ngue muka kupanga uje kasa kukala na shuamua, uje akuata muacili lizi lia vusunga. 16 Litenge ku vimpata via kasauntu na vimpande via vupi vije vituala lika vantu kulahako na Njambi. 17 Kaha vimpande viavo vinapu ngue mbandu yamukongo. Vamo hakati kavo vapuile Haimenease na Filetase, 18 vakevo vaje vanaseza vusunga muomu vahandeka nguavo kusanguka cinahiti laja. Valinakupihisa lutsilielo lua vakuavo. 19 Vuno honi luvula lua Njambi hanga luemana ngoo, na kasateso aka nguavo, "Muene azivuka vaje vendi," kaha naua nguavo, "Eceleni uoshe uje atumbula lizina lia Muene ahume ku viuma via mazilo."

20 Mu njivo yakama kumuakele lika vitenga via ngolinde cipue via siliva vuno honi na via kupanga ha miti na via vuma, vimo via ha cipale navikuavo viakupangesa lika ntsimbu yoshe. 21 Nga umo alilelesa ikeye vavenia ku vitenga viakupangesa ntsimbu yoshe, kaha akapua citenga cakupangesa ha cipale, viakulela na seho kuli liavenia njivo, vialivuahesela lumo kuvipangesa ku vipangi viacili. 22 Teua ku mashungu a vukuenje kaha pangela lika vusunga, na lutsilielo, na cizango, na ciyulo hamo na vaje vasana Muene na mitima yakulela. 23 Litenge ku vimpata via vulema na vunzimba, uazivuka nguove vikanehe kulicokota. 24 Ngamba ya Muene kapandele kupua muka kulicokota vuno honi napande kupua ua ngozi ku muntu uoshe, mulongisi uacili, ua mutima uakusimpa, 25 uje asa kuhilula vaje vamuluisa na mutima uakulikehesa. Linga hamo Njambi akavahanako ntsimbu ngeci vakatenguluke ku vipi kaha vakazivuke vusunga, 26 linga vateue ku muheto ua Liyavolo, uje navakuata ngeci vapange muaya cizango cendi.