1 Nankuma tuyeni lutue ku vilongesa via kukola mu mana, nakuseza vilongesa viakulivanga via muzimbu ua vaka Kilistu. Keti naua tujale luvula lua kutenguluka ku vipangi via vulema kaha tutsilieleni muli Njambi, 2 na vishika via ha kumbuitika, nakusaleka mavoko, na kusanguka ca vatsi, na kusompa ca yaye. 3 Kaha eci cikeco tukalinga nga Njambi atava.

4 Muomu cacikalu naua kuhiluisa vaje vatsilieleleho linga vatenguluke, vaje Njambi uatuililile ceke, vaje vamakeleleko vuana vua muilu, kaha vatambuile Cimbembesi Uakulela, 5 kaha vanamakela vucili vua lizi lia Njambi na vua vinzili ya miaka ije ilinakuija, 6 kaha nga vanau, cikapua cacikalu kuvahiluisa ku kutenguluka naua, muomu ya mulonga uavo vavenia valinashukika naua Muna Njambi nakumuhana mukasauntu ku civunga.

7 Njambi akuisula mavu aje anatumbula mema a kalunga ntsimbu yoshe aje akanokelaho, na kukolesa muacili vimbuto kuli vaje vavilimine. 8 Vuno honi nga mavu ema mingonga na shaku, kaha anapu angoco kaha vaka asinga, kaha kumamanusuilo vaka atsimika.

9 Cipue vene tuhandeka ngacije hali yeni vacizango, tunazivuka muacili nguetu mulina viuma viacili vije vinakundama ku kuovoka. 10 Muomu Njambi keti ua civembulu ngeci ayengule vipangi vieni na cizango cimuamuesele muomu ya ikeye mukupangela vantu vakulela va Njambi, ngue muje hanga mumucili nakulinga. 11 Kaha tushunguiya umo na umo ueni amuese lukakateya luakulifua noho na kuntsongo ngeci viuma vioshe vimuli nakutsiliela vikapue via vusunga, 12 linga keti mupue vilenda, vuno honi vaka kutemunuina vaje kuhitila mu lutsilielo nakusimpa vakasuana vikulaheso.

13 Omo Njambi uapangele cikulaheso kuli Avilahama, muomu kukuakele umo uakuhiana linga alisingileho, ualisingile hali ikeye vavenia, 14 nguendi, "Muavusunga vene njikakukuisula nakukulanesa." 15 Kaha Avilahama, mukusimpa nakuvandamena, uatambuile cikulaheso. 16 Cilivene vantu vakalisingila hali uje navahiana, kaha eci cikeco cikamanesa vimpata vioshe. 17 Kaha omo Njambi uatondele kumuesa cikuma ku vantu vendi cikulaheso cije kuce kutenguluka ha vutumbe vuendi, kaha ualisingile, 18 linga kuhitila ha viuma vivali vije kuvie kutenguluka, ngeci cipue cacikalu Njambi kukuisa, kuli yetu vaje vanauana kuamena linga tukale nakusimpa cakama mukukuata kutsiliela cije vanatutulikila. 19 Tuli neci kupua vusunga na cikongo ca muono, kutsiliela cije cikovela mukati ka ntanga ije ili kunima ya mulili uakulela, 20 kuje Yesu nayi kupua muka kututuamenena, muomu ha kupua kasasendote uakama ua yaye ngue muje muapuile Melekizendeki.