1 Honi kuya ha kuija ca Muene uetu Yesu Kilistu na ha kukunguluka cetu linga tukale hamolika nendi, njimilomba vamuanetu nguange, 2 keti mukale na citanga mu vuasi mu visinganieka vieni cipue cishoti ku mutima ngueni Litangua lia Muene linahete. Hamo vasinganieka ngeci tuahandekele eci omo tuambuluile vunanguizi cipue omo tuambuluile lizi, omo tuasonekele evi mu mukanda. 3 Keti mutave umo amikuise mu ngila yeka naua houe. Muomu litangua lije kulikeja ngoco kuvanga noho kulitengulukila kua mamanusuilo kuneja na uje yala uakuhonoua kuononoka lishiko nasholoka, uje ivahanguilile kuya ku ngehena. 4 Kaha ikeye akaluisa viuma vioshe vije vivahandeka nguavo vanjambi na cuma nkala civalemesa, akalihaka helu lia vioshe. Kaha naua akakovela nakutumama mu Njivo ya Njambi nakulitumbula ikeye vavenia nguendi Njambi.

5 Nkuma kumuasa kuvuluka ndi? Njamilekele vioshe evi omo njakele hamo neni. 6 Vuno honi kucili cuma cimo cilina kuvindika evi viuma ngeci keti vilingiue hano vene, kaha yeni muazivuka ngueni cinapu cuma muka. Nankuma, omo ntsimbu ikapuamo ambahoni akeja. 7 Vupi vuakukomouesa cikuma vuavushueke vulina kulingiua hano vene, vuno honi vije vilina kulingiua kuvikalingiua kuvanga noho uje muka kuvuvindika vanamuhumisa. 8 Ambahoni uje yala uakuhonoua kuononoka lishiko akasholoka, vuno honi omo Muene Yesu akeja, akamutsiha na muku uakuhuma mu kanua kendi nakumunongesa na vumpau vuendi. 9 Uje yala uakuhonoua kuononoka lishiko akeja na nzili ya Satana nakulinga vimueso na vikomoueso viakuliseza seza via makuli, 10 kaha akapangesa miyati yoshe yakapenga ya makuli hali vaje vakanonga. Vakevo vakanonga muomu kuvatambuile nakuzanga vusunga ngeci vovoke. 11 Nankuma, Njambi natumu nzili yakuvasevuisa linga ipange muli vakevo ngeci vatsiliele vije vinapu via makuli, 12 kaha linga voshe vaje kuvatsilielele vusunga, vuno honi vanakundama lika ku vupi, vakavahisa.

13 Tunapande kutsantsela kuli Njambi ntsimbu yoshe hali yeni vamuanetu, yeni vaje vazanga Muene. Muomu Njambi uamihanguile kupua vambangelo ku kuovoka ha nzili ya Cimbembesi nakumipuisa vantu vendi vakulela, mu lutsilielo lueni lua vusunga. 14 Kaha Njambi uamisanene ngeci mulinge cuma eci ha Muzimbu Uacili ua vije vituambuluile kuli yeni, uamisanene ngeci mukahinge cihela ceni ca vumpau vua Muene uetu Yesu Kilistu. 15 Ambahoni vamuanetu, imaneni ngoo na lukakateya ku vusunga vuje vutuamilongesele mukuambulula cetu na mu mukanda uetu.

16 Honi Muene uetu Yesu Kilistu vavenia na Njambi Tatetu, vaje vatuzangele na ku kavumbi kavo vatuhanene kukolesa cije kucekutenguluka na kusimpa cacili ca kutsiliela, 17 vakamisimpise nakumikolesa mukupanga nakuhandeka vije vinapu viacili ntsimbu yoshe.