1 Mukumanusula vamuanetu, netu naua tulombeleleniko linga lizi lia Muene liye kulutue nakushandoka vuasi vuasi linga valitambule nakalemeso, ngue muje mu mualitambuile hakati keni. 2 Kaha lombeleni naua linga Njambi atuohiele ku vantu va vupi, muomu keti ngue vantu voshe vanapu vaka kutsiliela ku lizi houe.

3 Vuno honi Muene uapua uakulongua, kaha akamikolesa na kuminiunga kuli uje muka vupi. 4 Kaha Muene natuhana kusimpa muli yeni, kaha muavusunga vene tunatsiliela nguetu mulina kutualelelaho kulinga vije vituamilekele linga muvilinge.

5 Kaha honi Muene atuamenene mitima yeni mukuvuisisa cizango ca Njambi na lukakateya luje luanamihana Kilistu.

6 Mu lizina lia Muene Yesu Kilistu tulina kumishika, vaka kutsiliela litengeni ku vantu voshe vaje valinakuyoya yoyesi ya vulenda, vaje kuveku kavangeya vilongesa vije vituavahanene. 7 Yeni vavenia muazivuka muacili ngueni munapande kupanga ngue muje mutuapangele yetu. Kutuakele na vulenda omo tuakele hamo neni. 8 Kutualile cuma ca muntu umo kuakuhona kufueta. Vuno honi tuatualeleleho kupanga vutsiki na mutania ngeci keti tumituike citeli cimo. 9 Tualingile eci, keti ngue muomu kutuakele na nzili yakuyoyela ha viuma via vukuasi, vuno honi tuacilingile mukumimuesa ngila linga muyikave. 10 Ha ntsimbu ije omo tuakele hamo neni, tuakele nakumileka nguetu, "Uoshe aviana kupanga keti vamutavese kulia."

11 Tunahandeka eci muomu tunevu nguavo hakati keni kuli vamo valinakuyoya yoyesi ya vulenda kaha vivalingevene viahi vuno honi vakundama lika mu vipangi via vakuavo. 12 Kaha mu lizina lia Muene Yesu Kilistu tulina kushika vantu ava nakuvanangula linga vayoye muacili nakulinga vipangi vije vivasa kuyoyelaho. 13 Vuno honi yeni vamuanetu, kumuapandele kuhona kulinga muacili. 14 Kaha hamo kuli yeni umo uje katondo kuononoka lizi lietu lije tuatumu kuli yeni mu mukanda ou. Kaha nga ngoco mutaleni, kaha mushondolokeni linga shuamua imukole. 15 Keti mu mupangese ngue napu citozi, vuno honi munanguleni lika ngue vaka kutsiliela.

16 Kaha Muene vavenia, uje uapua ntsina ya ciyulo cetu, amihane ciyulo ha ntsimbu yoshe na mu vingila vioshe. Muene akale neni muva voshe.

17 Na livoko liange vavenia njasoneka nguange cihindu cakuhuma kuli yange Paulu. Eyi ikeyo ngila ya cimueso ca mikanda yange yoshe, omu mukemuo munjikasoneka.

18 Kavumbi ka Muene uetu Yesu Kilistu kakale neni voshe.