1 Yange Paulu, kanganda ua Kilistu Yesu mukushika ca Njambi Muyoyesi uetu na Kilistu Yesu ikeye kutsiliela cetu,

2 Njikusonekela yove Timateo, munange ua vusunga mu lutsilielo.

Kavumbi na cikeketima na ciyulo vije vihuminima kuli Njambi Tate na Kilistu Yesu Muene uetu vikale kuli yove.

3 Ngue muje njakusindiyile omo njakele nakuya ku Masendoniya, sala mu Efeso ngeci umone vantu vamo linga keti valongese vilongesa via makuli, 4 cipue kulinga vakevo vavenia na visimo na mikana ya mazina alaha avakukuluila vavo vije vineha vimpata, muomu kuvie kukundama ku vutumbe vua Njambi vuje vuli mu lutsilielo. 5 Vutumbe vua lishiko eli vukevuo cizango, cije cihuma mu mutima uakulela, na vilinga viakutungukua, na lutsilielo lua vusunga. 6 Vantu vamo vanaseze viuma evi na kuhandeka via vulema. 7 Vatonda linga vapue valongisi va lishiko, cakuhona kuvuisisa cipue vije vivahandeka cipue viuma vije vivali na kuhandeka mu vinalumbunukilamo.

8 Honi tuazivuka nguetu lishiko liapua liacili, nga umo alipangesa muacili. 9 Hakuvuisisa eci, ngeci lishiko kuvali pangelelele vaka vusunga vuno honi valipangelelele vipapoke na vakakuhona kuononoka, na vaje vakakuhona kuononoka Njambi na vaka vipi, na vaje vakuhona kulela na vaje vaka kushaula via kulela, na vaka kutsiha vaishavo na vaka kutsiha vainavo, na vaka kutsiha vantu, 10 na vaka kulinga vupangala, na vamala vaje vakakulinga vukoyi na vakuavo vamala, na manguangua, na vaka makuli, na vaka kuhana vukaleho vua makuli, nakulinga viuma vije viluisa vilongesa via vusunga, 11 kuya ku Muzimbu Uacili ua vumpau vua Njambi uakukuisula uje uvanjihanene.

12 Njitsantsela Kilistu Yesu Muene uetu, uje nanjihana nzili yakulinga vipangi viange, muomu nanjisompo muavusunga hakunjihangula mu vipangi viendi, 13 cipue vene ha kulivanga njapuile muka kumushaula na kumuyandesa nakumutuka, vuno honi njatambuile cikeketima muomu njakele nakuvilinga cakuhona kuzivuka na kuhona kutsiliela. 14 Kaha Muene uetu uetilile kavumbi kendi hali yange na lutsilielo na cizango vije vili muli Kilistu Yesu. 15 Eci kuhandeka cinapu ca vusunga kucitambula, cije cihandeka nguaco Kilistu Yesu uezile ha mavu mukuovola vaka vipi, kaha hali voshe ava yange njinapu muka vupi cikuma, 16 vuno honi yange njatambuile cikeketima ha cuma eci, linga muli yange uje uakulivanga, Yesu Kilistu amuese kushula ca lukakateya luendi linga cipue cimueso kuli vaje vapande kutsiliela muli ikeye ha muono uayaye. 17 Kuli Muene ua miaka yoshe, uje kekutsa, uje kutuekumona, ikeye Njambi lika, kukale kasingimiko na vumpau ku miaka yoshe. Ameni.

18 Eli lishiko njikundika kuli yove, Timateo munange, kuya ku vunanguizi vuje vahandekele hali yove, pangesa mezi aua ngue vitua via nzita linga ulue muacili, 19 kaha niunga lutsilielo luove na vilinga viove via kutungukua. Hakuviana vilinga viavo via kutungukua, vantu vamo vananongesa lutsilielo luavo, 20 hakati kavo kuli Haimenease na Elekizanda, vaje njinahana kuli Satana linga valilongese kuhona kushaula.