1 Cakulivanga ku vioshe, njimisindiya nguange lombeleni, lombeleleni, na kutsantsela, evi vinapande kuvilinga vantu voshe, 2 ku vimiene na voshe vaje vali ha vituamo viakama, linga tuyoye vuyoye vuakuholoka na ciyulo, vua vunjambi na kasingimiko mu ngila yoshe. 3 Eci cinapu cacili, kaha vacitambula ku mesho a Njambi Muyoyesi uetu, 4 uje atonda vantu voshe linga vovoke nakuija ku mana a vusunga. 5 Muomu kuli Njambi umo lika, kaha kuli umo uje nemana mukati ka Njambi na vantu, ikeye yala Kilistu Yesu, 6 ikeye uje ualihanene ikeye vavenia ngue ndando yakupatula voshe, vukaleho vuje vuasemukilile ha ntsimbu yacili. 7 Muomu yeci vanjihanguile kupua muka kuambulula na kanganda (njili nakuhandeka vusunga, kunjesi nakukuisa), mulongisi ua vaje keti Vayunda mu lutsilielo na vusunga.

8 Ambahoni njitonda nguange mu vihela vioshe vamala vanapande kulombela, vajundule mavoko akulela cakuhona kuniengua cipue kulicokota. 9 Naua na vampuevo vasholoke muacili nakulikehesa, keti na vinkambu via kuvinda mueka cipue ngolinde cipue vusanga vuaseho cipue vuzalo vua ndando cikuma. 10 Vuno honi na vilinga viacili, ngue via vampuevo vaje vaka kulemesa Njambi. 11 Vampuevo valilongese mukuholoka namukulihana kuoshe kuli Njambi. 12 Kunjitavesa mpuevo uoshe kulongesa cipue kukala na nzili yakama hali vamala, vuno honi napande kuholoka. 13 Muomu Andama ikeye uapuile uakulivanga kutanga, ambahoni Eva. 14 Kaha keti Andama vakuisile, vuno honi vakuisile mpuevo kaha uapokuele lishiko lia Njambi. 15 Cipue vene ngoco mpuevo akovoka kuhitila mukusema vana, nga atualelelaho mu lutsilielo na mu cizango na kulela, na kasingimiko.