1 Cihandeka eci cinapu ca vusunga, nga muntu umo ashunguiya vipangi via vuntuama mu cikungulukilo, kaha ashunguiya cipangi cacili. 2 Honi ntuama ua cikungulukilo napande kupua muntu uakuhona mulonga, napande kupua yala uampuevo umo lika, napande kupua muntu uakuhakela mana ku viuma, muka kulihilula, muka kulongua, muka kujumbula vangenzi, uje asa kulongesa, 3 keti muka kupenda, keti muka vukalu vuno honi apue muka kuononoka, keti muka vimpata, keti muka kuzanga vimbongo. 4 Napande kuniunga ntanga yendi muacili, na vana vendi vapue vakuononoka nakasingimiko mu vingila vioshe. 5 Muomu nga yala ahonoua kuniunga ntanga yendi, nkuma vati honi asa kuniunga cikungulukilo ca Njambi? 6 Kapandele kupua muntu uje natsiliela vuavuno, hamo akalishasha nakulihalesa kaha akauila mucihiso ca Liyavolo. 7 Napande kupua muntu uje ivahana kasingimiko naku vantu vaje keti vamu cikungulukilo cendi, linga keti ovue shuamua na kuuila mu muheto ua Liyavolo.

8 Vakuasi va mu cikungulukilo navakevo naua vanapande kupua vafutisi yacili, keti vaka vindaka vivali, keti vaka kupenda viniu, keti vaka lizangamena lia vimbongo, 9 vanapande kukakateya ku vusunga vua lutsilielo na kutungukua cacili. 10 Kaha cakulivanga vanapande kuveseka tahi, ambahoni nga vavauana nguavo kuvesi na mulonga, kaha vavapuise vakuasi vamu cikungulukilo. 11 Vampuevo navakevo naua vanapande kupua vafutisi yacili, keti vakalufue, vuno honi vanapande kupua vakulisingimika, nakulongua mu viuma vioshe. 12 Vakuasi vanapande kupua yala ua mpuevo umolika, vanapande kuniunga vana vavo na ntanga yavo muacili. 13 Muomu vaje vapanga muacili ngue vakuasi vamu cikungulukilo vakauana kasingimiko vakevo vavenia naua nakusimpa mu lutsilielo luje luli muli Kilistu Yesu.

14 Njitsiliela kuija kuli yeni vuavuno, vuno honi njili nakusoneka evi vishika kuli yeni linga, 15 nga hamo njikotokela kuija, ngeci muzivuke muje vati muasa kukala muacili mu ntanga ya Njambi, cije cikeco cikungulukilo ca Njambi ua kuyoya, cije cisimi ca seho na luvula lua vusunga. 16 Cilivene tulina kuliambulula muje vati vusueke vua vunjambi vuetu muvunapuilamo vuakama:

Uasholokele mu vuntu,

vuno honi Cimbembesi uamusholuele kupua ua vusunga,

vamumuene ku tungelo.

Uambuluile ku mafuti,

vaka mavu vamutsilielele,

kaha vamutualele mu vumpau.