1 Keti utenukile mukuluntu ua yala vuno honi munangule ngue isho, pangesa vakuenje muacili ngue vamuanoko, 2 pangesa vakuluntu va vampuevo ngue vanoko, kaha pangesa na vambanda ngue vamuanoko va vampuevo, mukulela coshe. 3 Singimika vantuluue vaje vapua vantuluue va vusunga. 4 Nga ntuluue ali na vana cipue vatekulu, vapandele tahi kulilongesa vipangi via kutsiliela ku ntanga yavo nakukuasa visemi vavo muomu eci cikeco civuahelesa ku mesho a Njambi. 5 Nga uje ntuluue napu ua vusunga, kaha alinakuyoya lika liendi, kaha nahaka kutsiliela cendi muli Njambi na kutualelelaho nalukakateya mu malombelo vutsiki na mutania. 6 Vuno honi uje alihana ikeye vavenia musenga natsi laja cipue vene oku ayoya. 7 Shika eci, linga keti umo auane mulonga. 8 Nga umo kasa kukuasa vavushoko vendi, cikuma kuma ntanga yendi, kaha naviana lutsilielo kaha napihia kupulakana uje uakuhona kutsiliela.

9 Ntuluue uje kanda ahete ha miaka makumi atanu na limo kapandele kumusoneka kupua ntuluue, nga uapuile uakushomboka ku yala umo, 10 kaha muka kulinga vipangi viacili, uje nalele vana vendi muacili, muka kutambula vangenzi muacili, muka kulikesa kuli vakuavo vaka Kilistu, na kukuasa vaje vali mu tuyando, na kulihana ikeye vavenia ku vipangi viacili mu vingila vioshe. 11 Vuno honi viana kusonekesa vantuluue va vambanda, omo nga lishungu likapua liakama vakaseza Kilistu nakutonda kushomboka, 12 kaha vakalinehela cihiso vakevo vavenia, muomu vanapokola litavasano lia kulivanga. 13 Keti lika evi vuno honi vakalilongesa kuendangana, kuhuma njivo kuya njivo, kaha keti kuendangana lika vuno honi na lufue nakulikovelesa mu viuma viambala, nakuhandeka vije kuvapandele kuhandeka. 14 Kaha njitonda vantuluue va vambanda vashomboke, vaseme vana, nakuniunga vinjivo viavo, keti tuhane vitozi vetu muhela linga vahandeke viavipi hali yetu. 15 Muomu vamo vanahiluka laja munima nakukavangeya Satana. 16 Nga uoshe mpuevo muka kutsiliela ali na vavushoko vendi va vantuluue, napande kuvakuasa, linga keti cikungulukilo cikale na citeli, ngeci cikungulukilo cikuase vaje vantuluue vakuhona muka kuvakuasa.

17 Eceleni vakuluntu vamu cikungulukilo vaje vaka kuyula muacili linga vavafuete vimbongo luvali, cikuma kumani vaje vali nakupanga vipangi viakuambulula nakulongesa. 18 Muomu visoneka vihandeka nguavio, "Keti ukute ngombe ku kanua uje ajungula vinona," kaha na, "Muka kupanga napande kutambula fueto yendi." 19 Keti utave mulonga uoshe hali mukuluntu uamu cikungulukilo kuvanga hali vukaleho vua vantu vavali cipue vatatu. 20 Kuli vaje vali nakulinga vupi, vatenukile ha mesho a vantu voshe, linga voshe vakale mu liova. 21 Ku mesho a Njambi naku mesho a Kilistu Yesu naku mesho a tungelo vakuhangula, njikushika kuniunga mashiko aua cakuhona civembulu, keti ulinge civembulu kuli muntu uoshe. 22 Keti uzambule kusaleka mavoko ove ha vantu, keti ukovele mu vupi vua mukueni, liniunge yove vavenia kupua uakulela.

23 Keti unue lika mema, vuno honi nua na tuviniu tuatundende muomu ya muzimo liove nakuvavala vavala cove. 24 Vupi vuavamo vantu vunalisholola, vuli nakuvatuala kukusompa, vuno honi vupi vua vamo vukevuo vukasholoka kulutue. 25 Mu ngila imo vene, na vilinga viacili visholoka muacili, cipue vene oku keti viacili, vuno honi kuviasa kulishueka.