1 Honi Cimbembesi ahandeka nguendi ku matangua a mamanusuilo vamo vakaseza lutsilielo nakulihana ku vilinga via vimbembesi via makuli naku vilongesa via mahamba, 2 vilongesa evi vikeja kuhitila mu vaka makuli va civembulu vaje mashungu avo anajujuama, 3 vaje vaka kuvindika kuliambata nakuvindika kulia via kulia vimo vije Njambi uatangele linga vavitambule nakutsantsela kuli vaje vanatsiliela nakuzivuka vusunga. 4 Muomu viuma vioshe viatangele Njambi viapua viacili, kaha na cimo cahi civanapande kuviana nga vanacitambula na kutsantsela, 5 muomu vanavikundika na lizi lia Njambi na lilombelo.

6 Nga uhana evi vishika kuli vamuanetu, kaha ukapua mulongisi uacili ua Kilistu Yesu, nakuhiana mezi a lutsilielo na vilongesa viacili vije viunakava. 7 Keti ulinge viuma viavipi vije keti via vunjambi na visimo viangoco. Lilongese yove vavenia kulinga via vunjambi, 8 muomu kupangesa muvila kuli na seho, vuno honi vunjambi vuli na seho yakama mu vingila vioshe, muomu vilina vikulaheso via muono ua ntsimbu ino na muono uje uli nakuija. 9 Vihandeka vinapu via vusunga kaha vavitambula muacili. 10 Muomu yevi, mukemo tuli nakuhundangana nakupanga cikuma, muomu kutsiliela cetu cili muli Njambi uakuyoya, uje ikeye Muyoyesi ua vantu voshe, cikumani kuli vaje vatsiliela.

11 Shika nakulongesa viuma evi. 12 Keti utave muntu umo linga ashaule vukuenje vuove, vuno honi muesa cimueso kuli vaka kutsiliela mukuhandeka cove, na mufutisi yove, na mu cizango, namu lutsilielo, na mukulela. 13 Kuvanga noho hanjikezila, hana ntsimbu yove mukutanda visoneka ku vantu, mukuambulula na kulongesa. 14 Keti useze vuana vuje vuuli navuo, vuje vahanene kuli yove mu vunanguizi omo mpunga ya vakuluntu vasalekele mavoko avo hali yove. 15 Panga cikuma ha vipangi evi, lihane yove vavenia kuli vikevio, linga voshe vamone vipangi viove. 16 Liniunge yove vavenia nakuvilongesa viove, kaha tualelelaho kulinga viuma evi, muomu hakulinga ngoco kaha ukaliovola yove vavenia na vaje vaka kukuvuilila.