1 Ecela voshe vaje vali muintsi lia mukambo ua vundungo valinge vimiene vavo kupua vaseho na kuvasingimika, linga lizina lia Njambi navilongesa vietu keti vavishaule. 2 Vaje vali na vimiene vakutsiliela kuvapandele kuvashaula muomu navakevo vanapu vamuanetu, vuno honi vanapande kuvapangela muacili muomu vaje vauana vukuasi ku vipangi viavo vanapu vaka kutsiliela na vaje va vazanga.

Longesa nakuambulula vipangi evi. 3 Nga kuli umo alongesa vieka kaha kalitombola na lizi lia vusunga lia Muene Yesu Kilistu na vilongesa vije viendelela na vunjambi, 4 napu muntu muka kulihalesa, vuno honi kazivuka cipue cimo, kaha muka kuvavala mu mashungu nakulinga vimpata via mezi, vije vineha lifuua, na vimpata nakushaula na viyongola via vipi, 5 nakuhona kulivuasana hakati ka vantu vaje vakusinganieka via vipi, vakuhona vusunga, vasinganieka nguavo vunjambi vunapu cuma cakuuanena vufuko.

6 Kuli kufuka cakama mu vunjambi kuya na vije tuli navio. 7 Muomu kutuezile nacimo hano ha mavu, kaha naua kutukambataho cimo hano ha mavu. 8 Vuno honi nga tuli na viakulia na vuzalo, kaha tukapuisamo. 9 Vuno honi vaje vatonda kufuka vauila mu vieseko, na mu muheto, na mu viuma viavingi via vulema na mashungu a mapi aje atuala vantu mukuvapihisa nakuvanongesa. 10 Muomu cizango ca vimbongo cinapu nsina ya vipi vioshe, kuhitila mukutonda vimbongo vamo vanahumu ku lutsilielo kaha vanapokola mitima yavo na vusiua vuavuingi.

11 Vuno honi ngeci hali yove muntu ua Njambi, huma ku vioshe evi, tonda vusunga, na vunjambi, na lutsilielo, na cizango, na lukakateya, nakulikehesa. 12 Lua nzita yacili ya lutsilielo, kuatelela ku muono ua yaye uje vakusanene omo ualitavelele ku mesho avakaleho vavengi. 13 Ku mesho a Njambi uje muka kuhana muono ku viuma vioshe, na Kilistu Yesu ali muvukaleho vuendi ha mesho a Pontiyu Pilato uahanene vukaleho vuacili. 14 Njikushika nguange niunga mashiko aua kuakuhona kapenga na mulonga kutuala noho Muene uetu Yesu Kilistu akasholoka, 15 kaha eci vakacisholola ha ntsimbu yacili kuli uakukuisula uje ikeye Muka kushika umo lika, Muene ua vimiene na Shukulu ua vashukulu, 16 uje ikeye lika liendi kekutsa, kaha uayoya mu ceke cije naumo uahi asakushuenako, uje na umo uahi muntu uamumona cipue asa kumumona. Kuli ikeye kukale kasingimiko nakuyula ca miaka yoshe ya yaye. Ameni.

17 Kuli vaje vanafuku hano ha mavu, vashike keti valihalese, cipue kuhaka kutsiliela cavo ku vufuko vuangoco, vuno honi vatsiliele kuli Njambi uje muka kutuhana muvuingi vioshe linga tuvivuahelele. 18 Vanapande kulinga viacili, kufuka mu vilinga viacili, vapue vaka kukala muacili nakulipangela na vakuavo na mutima umo vije vivali navio, 19 linga valitulikile vakevo vavenia luvula luacili luakulutue, ngeci vakauane muono uje ukeuo vene muono uacili.

20 Yove Timateo, niunga vije vanakundika kuli yove. Teua vihandeka viangoco viakuhona vunjambi na vimpata vije mu makuli vavihandeka nguavo mana, 21 muomu vamo nguavo vali nauo, kaha muomu ya cuma eci vanazimbalesa lutsilielo luavo.

Kavumbi kakale nove.