1 Yange Paulu na Siluvanasi na Timateo. Ku vantu vaku cikungulukilo ca mu Tesalonika, vaje vanakundama kuli Njambi Tatetu na Muene Yesu Kilistu.

2 Kavumbi na ciyulo vikale kuli yeni vije vihuminina kuli Njambi Tatetu na Muene Yesu Kilistu.

3 Vamuanetu tunapande kutsantsela kuli Njambi ntsimbu yoshe muomu yeni. Eci cinapu cacili kuli yetu kulinga ngacije, muomu lutsilielo lueni luli nakukola cikuma na cizango cije muli naco kuli umo na mukuavo cije cili na kulivuezelela cikuma. 4 Kaha omu mukemuo tulina kulihalesa hali yeni mu vikungulukilo via Njambi. Tulina kulihalesela ha lukakateya lueni na kutsiliela ceni mu mapakeso oshe aua na tuyando otu mulina kuhitamo.

5 Kaha eci cinapu vukaleho ngeci kusompa ca Njambi cikeco ca vusunga, kaha mukapua va seho mu vumuene vuendi vuje vumulina kuyandela. 6 Njambi uapua uavusunga, kaha akaneha tuyando kuli vaje valina kumiyandesa. 7 Kaha akamihuimisa yeni mulina kuyanda, kaha na kuli yetu naua. Akalinga evi omo Muene Yesu akasholoka kuhuma muilu na tungelo vendi va nzili, 8 hamo na milengi ya tuhia, nakuzangamesa vaje kuvazivuka Njambi, na vaje kuvekuononoka Muzimbu Uacili ua Muene uetu Yesu. 9 Kaha vakayanda mukuva zangamesa ku miaka yoshe, na kuvahangununa ku mesho a Muene naku vumpau vuendi vuakama, 10 kaha omo akeja ha litangua lije nakutambula vumpau ku vantu vendi voshe vakulela nakalemeso kuli voshe vaje vanatsiliela. Neni naua mukakala hakati kavo, muomu neni naua munatsiliela lizi lije tuamilekele.

11 Kaha omu mukemuo tukamilombelela ntsimbu yoshe. Tulina kulomba kuli Njambi yetu linga amipuise vaka seho ku muono uje uamisanene ngeci muyoyemo. Na nzili yendi yoshe ashulise vutumbe vueni vuoshe vuacili nakumanesa vipangi vieni via lutsilielo. 12 Mu ngila eyi vene lizina lia Muene uetu Yesu likatambula vumpau kuli yeni, neni naua kuli ikeye, ha kavumbi ka Njambi yetu na Muene Yesu Kilistu.