1 Vamuanetu, kutuapandele kumisonekela ha vintsimbu na miaka omo viuma evi vikalingiua. 2 Muomu yeni vavenia muazivuka ngueni Litangua lia Muene likeja ngue muje muizi akeji vutsiki. 3 Omo vantu vahandeka nguavo, "Viuma vioshe vili muacili nakuholoka kuluu," ambahoni hajevene kunonga kukavauana! Hajevene cikeja ngue mushongo ua mpuevo atonda kusema, kaha vantu kuvakasa kuteua. 4 Vuno honi yeni vamuanetu, kumuesi mu milima, kaha Litangua lije keti likamikasumune ngue muizi. 5 Yeni voshe muapua vantu vaje vanakundama ku ceke, vaje vanakundama ku mutania. Yetu kutuakundamene ku vutsiki cipue ku milima houe. 6 Nankuma, kutuapandele kukosa tulo ngue veka, tunapande kutona nakulihilula. 7 Ikapu ntsimbu ya vutsiki omo vantu vakosa tulo, naua ikapu ntsimbu ya vutsiki omo vantu vakapende. 8 Vuno honi yetu tuakundama ku mutania, kaha tunapande kulihilula. Tunapande kuzala lutsilielo na cizango ngue ntelo ya hantulo, nakuzala kutsiliela ca kuovoka cetu ngue tepa. 9 Njambi katuhanguile kuyandela vutenu vuendi, vuno honi linga tukatambule kuovoka kuhitila muli Muene uetu Yesu Kilistu, 10 uje uatutsililile linga tukayoye hamo nendi, cipue tuyoya cipue tutsa omo akeja. 11 Nankuma, tulikoleseni umo na mukuavo nakulikuasa umo na mukuavo, ngue muje mumuli nakulinga hano.

12 Vamuanetu, tumilomba nguetu haneni kasingimiko kacili kuli vaje vali nakupanga hakati keni, vaje vamituamenena nakumishika mukuyoya cavu Kilistu. 13 Pangeni navo nakasingimiko kakama na cizango, muomu ha vipangi vije valinakulinga. Pueni vaka ciyulo hakati keni.

14 Vamuanetu, tumisindiya nguetu munangule vilenda, koleseni vipapoke, kuaseni vaka kuzeya, pueni vaka kusimpa ku muntu uoshe. 15 Taleni ngeci keti kukale umo ahiluisa vupi ku vupi, vuno honi ntsimbu yoshe pueni vakakulinga muacili kuli umo namukuavo na ku vantu voshe.

16 Pueni vaka nzolela ntsimbu yoshe, 17 lombeleni ntsimbu yoshe, 18 tsantseleni mu viuma vioshe. Eci cikeco catonda Njambi mukuyoya ceni mu vumo muli Kilistu Yesu.

19 Keti muzime Cimbembesi Uakulela, 20 keti musembulule mezi a tunanguizi. 21 Pueni vakakueseka viuma vioshe, kaha niungeni vije vinapu viacili, 22 kaha teueni viuma vioshe via vipi.

23 Honi Njambi uje mukakutuhana ciyulo amipuise vaka kulela mu vioshe, kaha aniunge vuntu vueni vuoshe vua cimbembesi, na muono na muvila, kuakuhona milonga yoshe hakuija ca Muene uetu Yesu Kilistu. 24 Uje namisana akacilinga, muomu uapua uakulongua.

25 Vamuanetu, netu tulombeleleni naua.

26 Hinduiseni voshe vaka kutsiliela nakulitsemba ca kulela.

27 Njimilambelela na nzili yakama ya Muene kutanda mukanda ou ku mesho a vaka kutsiliela voshe.

28 Kavumbi ka Muene uetu Yesu Kilistu kakale hamo neni.