1 Mukumanusula, omo kutuasele kutualelelaho kulinga cuma coshe ha kumimona, kaha tuayonguele linga vatuseze mu Atena likalietu lika. 2 Tele tunatumu Timateo, muanetu uje muka kupanga netu mu vipangi via Njambi mu kuambulula Muzimbu Uacili ua Kilistu. Tuamutumine mukumikolesa nakumikuasa ha lutsilielo lueni, 3 linga naumo uahi ua hali yeni akahiluke munima muomu ha mapakeso aua. Yeni vavenia muazivuka ngueni mapakeso aua anapu aku cizango ca Njambi hali yetu. 4 Tele ha ntsimbu ije tuakele hamo neni, tuamilekelele vualumo nguetu tukauana mapakeso, ngue muje mumuzivukila, evi vikevio cilivene vialingiuile. 5 Eci cikeco cinjatuminine Timateo. Muomu kunjasele kutualelelaho naua, nankuma, njamutumine linga akumone vati lutsilielo lueni mulunapu. Muavusunga vene kucapuile ngue Liyavolo namieseka, kaha ngue vipangi vietu vioshe viapuile viangoco!

6 Vuno honi Timateo nahiluka kuno, kaha natuleka muzimbu uacili ha lutsilielo lueni na cizango ceni. Natuleka nguendi ntsimbu yoshe mulina kutuvuluka, kaha mulina kutonda kutumona ngue naua muje yetu tulina kutonda kumimona. 7 Muomu ha cuma eci, mu makalu etu oshe na tuyando tuetu, tuakele nakulikolesa muomu yeni vamuanetu. Lutsilielo lueni lukeluo luatukolesele, 8 Honi tuyoya nga yeni muimana ngoo mu vuyoye vueni muli Muene. 9 Honi tuhonoua vati kutsantsela Njambi cikuma muomu yeni. Tulina kumutsantsela ha nzolela ije tulinayo ku mesho endi muomu yeni. 10 Vutsiki na mutania tulina kumulomba na mitima yetu yoshe linga atutavese kumimona mesho na mesho nakumihana vije vimunahonoua mu lutsilielo lueni.

11 Honi Njambi yetu na Tatetu na Muene uetu Yesu vatuvuahesele ngila linga tuije nakumimona! 12 Honi Muene akolese cizango ceni kuli umo na mukuavo na ku vantu voshe nakucipuisa cakama ngue muje mucinafu cizango cetu kuli yeni. 13 Mu ngila eyi vene akakolesa mitima yeni, kaha mukapua vakuhona katoma na kulela ku mesho a Njambi yetu na Tatetu omo Muene uetu Yesu akeja na voshe vaka kulela vendi.