1 Muomu yeni vavenia vamuanetu muazivuka ngueni nkuma kumeneka cetu kuli yeni kucapuile cangoco. 2 Muazivuka vati muje vatuyandesele nakutushaula mu Filipi ntsimbu kanda tuije kuli yeni mu Tesalonika. Kaha cipue vene kuakele kutuluisa cakama, Njambi yetu uatukolesele mukumiambuluila Muzimbu Uacili. 3 Kulomba cetu kuli yeni kucemanene ha vutumbe vuakusevuisa cipue ha matumbe a mapi, cipue kukuisa muntu umo. 4 Vuno honi vintsimbu vioshe tulina kuhandeka ngue muje Njambi atonda linga tulinge, muomu natutavesa yetu ngeci catupande kuambulula Muzimbu Uacili. Kututondo kueseka kuvuahelesa vantu, vuno honi kuvuahelesa Njambi uje muka kueseka mitima yetu. 5 Muazivuka muacili ngueni kutuezile kuli yeni mukuhandeka viakuzembeleka, cipue kulikuasesa mezi akumifuikafuika a cipululu, Njambi ikeye mukaleho uetu! 6 Kutuatondele linga vatushangazale kuli muntu umo houe, cipue kuli yeni cipue kuli veka, cipue vene ngue tunganda va Kilistu ngue tuasele kumihana citeli. 7 Vuno honi tuakele na ngozi omo tuakele neni hamo, ngue cisemi ua mpuevo omo alinakulela vana vendi. 8 Muomu ha cizango cetu kuli yeni, tualivuaheselele linga tulipangezele neni hamo keti lika Muzimbu Uacili uakuhuma kuli Njambi vuno honi na miono yetu naua. Muomu yeni muapuile vaje vatuazanga cikuma! 9 Muavusunga vene vulukeni vamuanetu, vati muje tuapangele nakuhundangana! Tuapangele vutsiki na mutania linga keti tupue citeli kuli yeni tele tuambulula Muzimbu Uacili ua Njambi kuli yeni.

10 Yeni munapu vakaleho vetu, na Njambi naua na ikeye napu mukaleho ngeci miono yetu ku mesho eni vaka kutsiliela yapuile yakulela, ya vusunga nakuhona mulonga. 11 Muazivuka ngueni yetu tuapangesele umo na umo ueni ngue visemi vapangesa vana vavo vavenia. 12 Tuamikolesele, tuamizembelekele nakumisindiya linga muyoye yoyesi ije ivuahelesa Njambi, uje alinakumisana linga mulipangezele hamo Vumuene vuendi vavenia na vumpau.

13 Naua kuli cuma cikuavo muomu vika ntsimbu yoshe tukatsantsela kuli Njambi. Omo tuaminehelele lizi lia Njambi, yeni mualiuvuile nakulitambula, keti ngue lizi liakuhuma ku vantu vuno honi ngue lizi lia Njambi, lije linapu lizi lia Njambi vene. Muomu Njambi alinakupanga hakati keni vaje vanatsiliela. 14 Vamuanetu, yeni muatemunuisile vikungulukilo via Njambi mu Yundeya, vije vili muli Kilistu Yesu. Muayandele na mapakeso akuhuma ku vantu veni ngue muje Vayunda mu vayandeselele vikungulukilo, 15 vaje vatsihile Muene Yesu na tunanguizi, nakutupakesa yetu. Vakevo kuve kuvuahelesa Njambi! Vapua vitozi ku vantu voshe! 16 Vesekele kutuvindika kuambulula lizi kuli vaje keti Vayunda linga na vakevo vatambule kuovoka. Mu ngila eyi vene vakevo vanashulisa vene seteko ya vipi vije vivalingile ntsimbu yoshe, vuno honi vutenu vua Njambi hakukotoka vuneja hali vakevo!

17 Ngue hali yetu vamuanetu, omo tualihangunukile neni mu kantsimbu kakandende lika, keti mu viyongola vietu houe, vuno honi ku muvila uantsitu lika, tuatondele kumimona cikuma kaha tuahundanganene na kueseka kumimona naua! 18 Tuatondele kuhiluka kuli yeni. Yange vene Paulu njesekele cikuma kuhiluka lualuingi vuno honi Satana katutavesele. 19 Nankuma, hangavene munapu yeni, keti veka houe, vaje vanapu kutsiliela cetu na nzolela yetu na cilongo cije tukalihalesa ha kuhiana ku mesho a Muene uetu Yesu omo akeja. 20 Cilivene, yeni munapu kulihalesa cetu na nzolela yetu!